نیویارک،23 ستمبر(اے پی پی): وزیر خارجہ مخدوم شاہ محمود قریشی نے کہا کہ پاکستان، افغانستان میں انسانی بنیادوں پر امدادی سامان کی ترسیل ہوائی اور زمینی راستوں کے ذریعے جاری رکھے ہوئے ہے۔ یہ بات انہوں نے اقوام متحدہ جنرل اسمبلی کے 76ویں اجلاس کے موقع پر بین الاقوامی کمیٹی برائے ریڈ کراس (ICRC ) کے صدر پیٹر مورر ( Peter Maurer ) کے ساتھ ملاقات کے دوران کہی۔
ملاقات میں افغانستان میں پنپتے انسانی بحران اور عالمی سطح پر معاونت کی فراہمی کے حوالے سے مختلف پہلوؤں پر تبادلۂ خیال کیا گیا۔
وزیر خارجہ نے کہا کہ پاکستان، سال ہا سال سےافغانستان میں جاری بین الاقوامی کمیٹی برائے ریڈ کراس کی خدمات کا معترف ہے اور کہاافغانستان میں پنپتے ہوئے انسانی و معاشی بحران، عالمی برادری کی فوری توجہ کے متقاضی ہیں،افغانستان کی مالی و انسانی امداد، نہ صرف انہیں بحران سے نکلنے میں معاونت فراہم کرے گی بلکہ افغانوں میں اعتماد سازی کیلئے احسن اقدام ہو سکتی ہے۔
انہوں نے کہا کہ افغانستان میں بڑھتی ہوئی بھوک، افلاس اور افراط زر کے پیش نظر، افغانستان کے منجمد اثاثوں کا کھولنا، انکی بروقت امداد کے مترادف ہوگا۔
وزیر خارجہ نے بین الاقوامی کمیٹی برائے ریڈ کراس کے صدر کو افغانستان میں انسانی بنیادوں پر معاونت کی فراہمی کیلئے پاکستان کی جانب سے ہر ممکن تعاون کا یقین دلایا
