سکھر،26 اکتوبر(اے پی پی): ریلوے اراضی پر قابضین کے خلاف محکمہ ریلوے سکھر ڈویژن نے ایک بار پھر آپریشن شروع کر دیا ہے ، محکمہ ریلوے کے ڈی این وین احمد جہانزیب نے ڈی ایس پی ریلوے پولیس ثناءالرحمن سمیت عملے کی نفری و بھاری مشینری کے ہمراہ شہر کے اہم ترین علاقے ریلوے ریجنٹ پھاٹک پر قائم زیر تعمیر کثیر المنزلہ عمارت کو مسمار کر دیا۔
آپریشن کے حوالے سے ڈی این ون احمد جہانزیب و دیگر ریلوے حکام کا کہنا تھا کہ ڈی ایس ریلوے سکھر شعیب عادل کے احکامات پر ریلوے اراضی پر قائم غیر قانونی تجاوزات ہر صورت ختم کرائی جائیگی ،تجاوزات کے خاتمے کیلئے شالیمار تا بندر روڈ پچیس سے زائد گھروں کو نوٹسز بھی جاری کردیئے گئے ہیں ۔انہوں نے قابضین سے کہا کہ ہے وہ تجاوزات از خود ختم کر دیں تاکہ بعد ازیں انہیں کسی قسم کی پریشانی کا سامنا نہ کرنا پڑے۔
سورس : وی این ایس ، سکھر
