اسلام آباد،26اکتوبر (اے پی پی):پارلیمانی کشمیر کمیٹی کے چئیرمین شہریار خان آفریدی نے کہا ہے کہ کشمیر مودی آر ایس ایس نظریہ پالیسی سے بھارت کی بنیادیں کھوکھلی کر رہا ہے، انسانیت کی تذلیل کرنے والے بھارت کا مسخ شدہ چہرہ دنیا کے سامنے لا کر رہینگے۔
پاک چائنہ فرینڈشپ سنٹر میں پریس کانفرنس سے خطاب کرتے ہوئے چیئرمین کشمیر کمیٹی شہریار آفریدی نے کہا کہ علی گیلانی کی تدفین کی اجازت نہیں دی گئی،مودی اور آر ایس ایس سوچ تمام انسانیت کے لئے ایک خطرہ بن گئی ہے، اب بھارت کو کسی اور دشمن کی ضرورت نہیں۔انہوں نے کہا کہ پاکستان کی حکومت اور پارلیمان سمیت سفارتخانے ہر فورم پر کشمیر کے حوالے سے معاملہ اٹھا رہے ہیں۔انہوں نے کہا کہ پارلیمان میں موجود تمام جماعتیں، سول و ملٹری قیادت کشمیر کے مسئلہ پر ایک پیج پر ہیں، دنیا کو بھارت کے مسخ شدہ چہرے سے آگاہ کرنا ہمارا کام ہے۔
