اسلام آباد، 09 اکتوبر (اے پی پی ): 144 پی ایم اے لانگ کورس میں اعزازی شمشیر بٹالین سینئر انڈر آفیسر عثمان انور نے حاصل کیا ،جن کا تعلق نوشکی بلوچستان سے ہے۔ انہوں نے ملٹری کالج سوئی سے تعلیم حاصل کی ہے ۔اپنی کامیابی کو بٹالین سینئر انڈر آفیسر عثمان انور نے اپنی سخت محنت، والدین کی دعاؤں اور پی ایم اے کی فیکلٹی اور انسٹرکٹرز کی انتھک کوششوں کا نتیجہ قرار دیا۔
عثمان انور نے کہا کہ الحمداللہ آج مجھے اعزازی شمشیر سے نوازا گیا جو کہ لانگ کورس کے مجموعی طور پر بہترین کیڈٹ کو دی جاتی ہے،انشاء اللہ میں مستقبل میں بھی اسی جذبے اور لگن سے کام کروں گا تاکہ اپنی قوم کی امیدوں پر پورا اتر سکوں۔ انہوں نے کہا کہ اللہ میری نصرت فرمائے کہ میں اپنے زیر کمان افراد کی جرأت مندانہ قیادت اور اپنے آخری سانس تک مادر وطن کی حفاظت کر سکوں۔
144 پی ایم اے لانگ کورس میں پریذیڈنٹ گولڈ میڈل بٹالین سینئر انڈر آفیسر حمزہ نذیر نے حاصل کی، جن کا تعلق جہلم سے ہے۔اپنی کامیابی کو بٹالین سینئر انڈر آفیسر حمزہ نذیر نے اپنی کامیابی لگاتار محنت، والدین کی دعاؤں اور پی ایم اے اور اس سے پہلے کے مادر علمی ملٹری کالج مری کے انسٹرکٹرز کی دی گئی عمدہ تربیت کا نتیجہ قرار دیا۔
حمزہ نذیر نے کہا کہ الحمد اللہ آج مجھے پریذیڈنٹ گولڈ میڈل سے نوازا گیا جو کہ لانگ کورس کے مجموعی طور پر دوسرے بہترین کیڈٹ کو دیا جاتا ہے۔ میں اپنی قوم اور پاک فوج کے لیے ایک قابلِ فخر اثاثہ بننا چاہتا ہوں۔ پاکستان زندہ باد
144 پی ایم اے لانگ کورس میں سینئر انڈر آفیسر پیرس (سری لنکا) نے چیف آف آرمی سٹاف گولڈ میڈل حاصل کیا ۔انہوں نے کہا کہ میں نے کامیابی کے ساتھ یہاں اپنی دو سالہ ٹریننگ مکمل کر لی ہے۔ آج مجھے چیف آف آرمی سٹاف بیسٹ اورسیز گولڈ میڈل سے نوازا گیا ہے، یہ میرے لیے بہت بڑے اعزاز کی بات ہے کہ میں نے پاکستان ملٹری اکیڈمی جیسے عظیم ادارے سے یہ ایوارڈ ملا جس کا شمار دنیا کی بہترین ملٹری اکیڈمیز میں ہوتا ہے۔
سینئر انڈر آفیسر پیرس نے کہا کہ میں کمانڈنٹ پی ایم اے، میجر جنرل عمر احمد بخاری، پلاٹون کمانڈرز اور دیگر فیکلٹی، اساتذہ، اپنے والدین اور اپنے تمام ساتھیوں جنہوں نے اس دوران میری رہنمائی اور مدد کی، کا شکریہ ادا کرتا ہوں۔میں بہت سارے ناقابلِ فراموش لمحات گزارنے کے بعد پی ایم اے کو اپنا دوسرا گھر اور 144 لانگ کورس کو اپنا خاندان سمجھتا ہوں،۔ مجھے آپ سب کی بہت یاد آئے گی ،آپ کی مہمان نوازی کا بہت شکریہ۔
144 پی ایم اے لانگ کورس میں کورس انڈر آفیسر وقار نے چیف آف آرمی سٹاف کین ٹرافی 33 ٹیکنیکل گریجوایٹ کورس میں حاصل کی ، کورس انڈر آفیسر وقار کا تعلق جلال آباد، گلگت بلتستان سے ہے۔انہوں نے کہا کہ الحمد اللہ مجھے آج چیف آف آرمی سٹاف کین سے نوازا گیا جو کہ کورس کے بہترین کیڈٹ کو دی جاتی ہے، میرا یہ اعزار والدین کی دعاؤں اور اساتذہ کی بے پناہ کوششوں کے مرہون منت ہے ۔ انشاء اللہ میں اپنے آپ کو محنت کے ساتھ اس اعزاز کا اہل ثابت کروں گا اور اپنی قوم کی توقعات پر پورا اتروں گا۔ پاک فوج زندہ باد ، پاکستان پائندہ باد۔
144 پی ایم اے لانگ کورس میں کورس انڈر آفیسرحور فاطمہ نے کمانڈنٹ کین18 لیڈی کیڈٹس کورس میں حاصل کیا۔انہوں نے کہا کہ الحمد اللہ مجھے اس اعزاز سے نوازا گیا جو کہ کورس کی بہترین لیڈی کیڈٹ کو دیا جاتا ہے۔
کورس انڈر آفیسرحور فاطمہ نے کہا کہ پاک فوج خواتین کو زبردست مواقع فراہم کرتی ہے، پاک فوج میں تقریباً 27 فیصد خواتین ہیں جو کہ کیپٹن سے لے کر لیفٹیننٹ جنرل تک مختلف حیثیتوں میں اپنی خدمات سر انجام دے رہی ہیں،یہ سب ہی میرے لیے انسپائریشن کا ذریعہ رہی ہیں۔ انشاء اللہ میں اسی جذبے اور لگن سے کام کرتی رہوں گی تاکہ میں قوم کی خدمت کر سکوں اور پاک فوج کی توقعات پر پورا اتر سکوں۔ اللہ میرا حامی و ناصر ہو، آمین۔
