لاہور، 20 نومبر (اے پی پی): وفاقی وزیر تعلیم شفقت محمود نے کہا ہے کہ نیشنل کالج آف آرٹس کو یونیورسٹی کا درجہ دے دیا گیا ہے ، نئے بلاک کی تعمیر سے مزید طلبہ کو داخلہ ملے گا۔
ان خیالا ت کا اظہار انہوں نے نیشنل کالج آف آرٹس میں نئے گریجویٹ بلاک کاسنگ بنیاد رکھنے اور این سی اے ڈیجیٹل سٹوڈیو کے افتتاح کے موقع پر کیا۔ ان کا کہنا تھا کہ نئے بلاک کی تعمیر سے آئندہ زیادہ تعداد میں طلبہ و طالبات کو این سی اے میں داخلے کا موقع مل سکے گا، این سی اے کو پاکستان سمیت پوری دنیا میں آرٹ کے اداروں میں نمایاں مقام حاصل ہے، یونیورسٹی کا درجہ ملنے کے بعد اس میں مزید بہتری آئے گی، جلد این سی اے نئے کیمپسز کی تعمیر کا آغاز کرے گا۔
وفاقی وزیر تعلیم شفقت محمود نے سٹیٹ آف دی آرٹ ڈیجیٹل سٹوڈیو لیب کے قیام پر خوشی کا اظہار کرتے ہوئے انہوں نے یونیورسٹی کا درجہ ملنے پر طلبہ و طالبات اور فکیلٹی کو مبارکباد دی ۔ان کا مزید کہنا تھا کہ ہائر ایجوکیشن کے لئے جتنا بجٹ اس حکومت نے دیا ہے، اتنا ماضی کی کسی حکومت نے نہیں دیا۔
کورونا کے باعث سکولز کی بندش کے حوالے سے سوال کے جواب میں انکا کہنا تھا کہ اب ایسے حالا ت نہیں کہ سکولز بند کئے جائیں، پہلے ہی سکولز کی بندش کے باعث طلباء و طالبات کا کافی نقصان ہو چکا ہے۔
