پشاور، 26 نومبر(اے پی پی): وزیر اعلیٰ خیبر پختونخوا محمود خان نے صوبائی دارالحکومت پشاور اور صوبے کے دیگر اضلاع میں گیس کے کم پریشر اور لوڈشیڈنگ کے مسئلے کا نوٹس لیتے ہوئے جی ایم ، ایس این جی پی ایل کو اپنے دفتر طلب کرلیا اور پشاور سمیت دیگر اضلاع میں گیس کے کم پریشر اور لوڈشیڈنگ کے معاملے پر برہمی کا اظہار کیا۔
اس موقع پر وزیراعلی محمود خان نے جی ایم وئی گیس پشاور کو گھریلو صارفین کو درپیش گیس کے کم پریشر اور لوڈشیڈنگ کا مسئلہ جلد سے جلد حل کرنیکی ہدایت کرتے ہوئے کہا کہ صوبے اور بالخصوص پشاور میں گیس کی لوڈشیڈنگ اور کم پریشر کسی صورت برداشت نہیں کیجائیگی۔
وزیر اعلی نے اگلے 48 گھنٹوں میں صورتحال میں نمایاں بہتری لاکر رپورٹ پیش کرنے کا حکم دیتے ہوئے کہا کہ رواں سردیوں میں صوبے کے گھریلو صارفین کو گیس کی بلا تعطل فراہمی پر کسی صورت سمجھوتہ نہیں ہوگا، صوبے میں گیس کی ترسیل کے نظام کی بہتری کے منصوبوں کو جلد سے جلد مکمل کیا جائے۔
دوسری جانب ایس این جی پی ایل حکام نے بھی وزیر اعلی کو پشاور سمیت دیگر اضلاع میں گیس کے کم پریشر کا مسئلہ ترجیحی بنیادوں پر حل کرنے کی یقین دہانی کراتے ہوئے کہا کہ اگلے دو دنوں میں گیس کی فراہمی کے نظام میں نمایاں بہتری لائی جائے گی اور گھریلو صارفین کو گیس کے لو پریشر کا کوئی مسئلہ درپیش نہیں ہوگا۔
جی ایم سوئی گیس نے کہا کہ جن علاقوں میں گیس کے لو پریشر کا مسئلہ درپیش ہے وہاں پر بڑے قطر کے پائپ بچھائے جا رہے ہیں، اور اس ضمن میں گیس کے کم پریشر سے متعلق صارفین کی شکایت کے فوری ازالے کے لئے کنٹرول روم بھی قائم کیا گیا ہے۔
