کورونا، افغانستان سے فوجی انخلا کے دوران اے۔ ایس۔ ایف کی کارگردگی مثالی، خواتین کی شمولیت قابلِ ستائش ہے؛ صدرمملکت ڈاکٹر عارف علوی

کراچی،29نومبر  (اے پی پی):صدرمملکت ڈاکٹر عارف علوی نے ایئرپورٹ سیکیورٹی فورس اکیڈمی میں BASC-49 ایئرپورٹ سیکیورٹی کورس کی پاسنگ آئوٹ تقریب سے خطاب میں   کہا ہے کہ جب آپ قومی سلامتی کی ذمہ داریوں کو پورا کرنے کے لئے عوام کے ساتھ شائستگی سے پیش آتے ہیں تو آپ کی پیشہ ورانہ مہارت کا اندازہ لگایا جاتا ہے اور عوام کے میں مثبت  تاثر بنتا ہے۔ انہوں نے کہا کہ کوروناوائرس کی وباء کے دوران اپنی پیشہ وارانہ ذمہ داریوں کو احسن طریقے سے نبھانے اور افغانستان سے حالیہ انخلاء کے دوران خدمات فراہم کرنے پر اے ایس ایف کو سراہا گیا ہے جس سے دنیا میں بھی مثبت تاثر گیا ۔ انہوں نے اے ایس ایف میں خواتین کی اچھی تعداد میں شمولیت پر اطمینان کا اظہار کرتے ہوئے بانی پاکستان قائد اعظم محمد علی جناح کے اس قول کا حوالہ دیا کہ پاکستان اس وقت ترقی کرے گا اور خوشحال ہوگا جب خواتین ہر میدان میں حصہ لیں گی۔