اوکاڑہ،16دسمبر(اے پی پی ):سانحہ آرمی پبلک سکول پشاور کے شہدا کو خراج تحسین پیش کرنے کے لئے ڈپٹی کمشنر آفس کے لان میں دعائیہ تقریب کا انعقاد کیا گیا۔ ڈپٹی کمشنرکیپٹن (ر) محمد علی اعجاز، ڈسٹرکٹ پولیس آفیسر فیصل گلزار نے یاد گار شہدا پر پھولوں کی چادریں چڑھائیں اور شہدا کے درجات کی بلندی اور پاکستان کے استحکام کے لئے خصوصی دعائیں کی گئیں ۔
اس موقع پر ڈپٹی کمشنر کیپٹن (ر) محمد علی اعجاز نے خطاب کرتے ہوئے کہا کہ 16 دسمبر پاکستان کی تاریخ میں ایک سیاہ دن ہے اس دن اے پی ایس پشاور کے طلباء اور اساتذہ نے اپنی جانوں کا نذرانہ پیش کیا، ان معصوم طالب علموں اور اساتذہ کی قربانی نے پاکستانی قوم کو متحد کیا اور اس دن یہ فیصلہ ہوا کہ ہم نے متحد ہو کر ہر طرح کی دہشت گردی کا مقابلہ کرنا ہے اور ان سماج دشمن عناصر کو کیفر کردار تک پہنچانا ہے، ان طالب علموں کی قربانیوں نے ملک میں امن و امان کی صورت حال جو آج ہ میں نظر آتی ہے وہ ان شہدا کی قربانیوں کا ثمر ہے ۔
انہوں نے کہا کہ ان بچوں کی قربانیوں نے اس قوم کو یکجا کیا، پھر پاک فوج اور قومی اداروں نے مل کر دہشت گردی کا مقابلہ کیا، ملک میں امن قائم کرنے کے لئے ہمارے بچوں نے قربانیاں دیں، پاک فوج اور پولیس نے قربانیاں دیں، آج پوری قوم متحد اور متفق ہے کہ ہم وطن عزیز کے لئے ہر قربانی دینے کے لئے تیار ہیں ۔ انہوں نے کہا کہ پاکستان سے دہشت گردی کے عفریت کو ختم کرنے کے لئے تمام ادارے علماء،صحافی اور عام لوگ متحد ہیں ۔
ڈسٹرکٹ پولیس آفیسر فیصل گلزارنے کہا کہ آج کے دن دہشت گردوں کو کیفر کردار تک پہنچانے کے لئے پاک فوج ،پولیس اور دیگر اداروں نے جو قربانیاں دی ہیں وہ تاریخ کا روشن باب ہے ۔ انہوں نے وطن عزیز کو دہشت گردی سے پاک کرنے کے لئے ہر طرح کی قربانیاں دینے کے عزم کا اعادہ کرتے ہوئے کہا کہ ہ میں اپنی صفوں میں اتفاق و اتحاد پیدا کرنا ہے تا کہ دشمن اپنے مذموم مقاصد میں کسی صورت کامیاب نہ ہوسکے ۔
انہوں نے کہا کہ ہر پاکستانی سانحہ آرمی پبلک سکول میں شہید ہونے والے بچوں ،اساتذہ کرام و سٹاف ممبران کے لواحقین کے غم میں برابر کا شریک ہے ۔
تقریب میں تمام ضلعی محکموں کے سربراہان، اساتذہ ، شہریوں اور صحافیوں کی کثیر تعداد نے شرکت کی ۔
پیسورس:وی این ایس،اوکاڑہ
