اوکاڑہ،یکم دسمبر)اے پی پی) :ڈپٹی کمشنر کیپٹن (ر) محمد علی اعجاز کی زیر نگرانی تحصیلدار آفس اوکاڑہ میں ریونیو عوامی خدمت کچہری کا انعقادہوا اسسٹنٹ کمشنر آصف نواز نے ریونیو عوامی خدمت کچہری میں آنے والے سائلین کے مسائل سنے اور موقع پر ہی انہیں حل کرنے کے احکامات جاری کئے ۔ انہوں نے کہا کہ پنجاب حکومت ہر شعبہ میں روائتی طریقہ کار سے ہٹ کر جدید سائنسی اصولوں پر مبنی طرز عمل سے بنیادی تبدیلیوں کی خواہاں ہے محکمہ مال سے لوگوں کے معاملات کی احسن انداز میں جلد حل کرنے کے لئے ہر ماہ ریو نیو عوامی خدمت کچہریاں بھی اسی سلسلہ کی کڑی ہے ریونیو عوامی خدمت کچہری کا بنیادی مقصد ریونیو سے جڑے معاملات کے سلسلہ میں لوگوں کے مسائل کا موقع پرحل ہے کاشتکاروں اور کاشتکاری سے وابستہ لوگوں کی سہولت اولین مقصد ہے پنجاب حکومت لوگوں کے مسائل مقامی سطح پر حل کرنے کے لئے کوشاں ہے اور ریو نیو عوامی خدمت کچہریاں تسلسل سے جاری رہیں گی ۔ انہوں نے کہا کہ ریونیو عوامی خدمت کچہری میں ریو نیو سے متعلقہ معاملات کے میرٹ پر حل،ڈومیسائل کے اجراء ،معائنہ ریکارڈ، انکم سرٹیفیکٹ، رجسٹری انتقالات کا اندراج ، فرد کا اجراء اور درستگی ریکارڈ کے معاملات فوری حل کئے جا رہے ہیں،انہوں نے کہا کہ لوگوں کے ہفتوں اور مہینوں میں ہونے والے ریونیو سے متعلقہ کام اب گھنٹوں میں ہو رہے ہیں جو کہ خوش آئند ہیں ۔ انہوں نے محکمہ مال کے افسران کو ہدایت کی کہ وہ اپنے اپنے دفاتر میں ریڈ ٹیپ ازم کو فوراََ ختم کریں اور لوگوں کے لئے سہولت پیدا کریں۔
