کوئٹہ،1دسمبر (اے پی پی):ڈپٹی اسپیکر قومی اسمبلی قاسم خان سوری نے کہا ہے کہ صاحب حیثیت اور تاجر برادری ملک کے غریب اور نادار لوگوں کی بھرپور مدد کریں۔
ان خیالات کا اظہار انہوں نے ضلعی زکوة و عشر کے دفتر میں چین کے ایمبسی کی طرف سے فراہم کردہ امدادی خورد و نوش کی اشیاءغریب اور نادار لوگوں میں راشن تقسیم کے موقع پر کہی۔ انہوں نے کہا کہ موجودہ حکومت ملک کے غریب اور ضرورت مندوں کی بھرپور مدد کررہی ہے جس کا واضح ثبوت احساس پروگرام ہے اس کے علاوہ بھی ملک کے ضرورت مندوں اور غریبوں کو مختلف مدوں میں سبسیڈی دی جارہی ہے۔
ڈپٹی اسپیکر قومی اسمبلی قاسم خان سوری نے کہا کہ ملک میں غربت کی صورت حال کو بھانبتے ہوئے موجودہ حکومت نے کورونا جیسے موذی مرض سے بچاﺅ کے لئے ملک میں سمارٹ لاک ڈاﺅن کا اعلان کیا تاکہ ہمارے ملک کے غریب طبقہ زیادہ متاثر نہ ہو جس پر کافی تنقید کیا گیا جبکہ ترقی یافتہ ملکوں میں سخت لاک ڈاﺅن کی وجہ سے لوگ بے حد متاثر ہوئے جس کی وجہ سے وہاں کے لوگ شاپنگ مال اور اشیاءخورد و نوش کی دکانوں کو لوٹنے پر مجبور ہوئے جبکہ ہمارے ملک میں جذبہ ایثار اور اسلامی اصولوں کی پاسداری کرتے ہوئے صاحب ثروت لوگوں نے اپنے ملک کے غریب اور ضرورت مند لوگوں کی بھرپور مدد کی اور الحمداللہ ہم انہی کاوشوں کی وجہ سے اس ناگہانی آفت سے نکل جانے میں کامیاب ہوئے۔
قبل ازیں ڈپٹی اسپیکر قومی اسمبلی قاسم خان سوری نے چین کے ایمبسی کی طرف سے فراہم کردہ امدادی خورد و نوش کی اشیاءضرورت مند لوگوں میں تقسیم کی۔ اس موقع پر چیئرمین ضلعی زکواة و عشر کمیٹی کوئٹہ اور دیگر افسران موجود تھے۔
