لاہور، 2 دسمبر ( اے پی پی ): وزیر قانون پنجاب راجہ بشارت کی زیر صدارت سول سیکریٹریٹ میں کابینہ کمیٹی قانون کا 77 واں اجلاس ہوا ۔ اجلاس میں مختلف محکموں کے دس ایجنڈا امور زیر غور آئے، متعدد کی منظوری دی گئی ۔
پنجاب میں 35 مقامات پر پن بجلی کے چھوٹے منصوبے لگانے کے لیے گائڈ لائنز کا مسودہ منظور کرلیا گیا، رواں مالی سال کے لیے گاڑیوں کی انسپکشن فیس میں دس فیصد اضافے کی تجویز بھی منظورکر دی گئی جبکہ پنجاب لینڈ ڈویلپمنٹ اتھارٹی کے چیئرمین کے لیے طحٰہ محمد کے نام کی منظوری اور پنجاب لگژری ہاؤس ٹیکس رولز 2014 ء کی منظوری دی گئی ۔
اجلاس میں راوی اربن ڈویلپمنٹ اتھارٹی کے غیر سرکاری ممبر امجد وحید کا استعفی منظور کیا گیا اور قائد اعظم تھرمل پاور کمپنی کے بورڈ میں ظہیر کھوکھر، محمد علی، فرخ افضل اور وسیم اختر کی نامزدگی سے اتفاق کیا گیا۔
اجلاس میں پنجاب ورکرز ویلفیئر فنڈ رولز 2021 ء کا مسودہ منظورلاہور والڈ سٹی کا دائرہء کار پورے صوبے تک بڑھانے کی تجویز مزید غور کے لیے ملتوی کر دی گئی ۔اجلاس میں محکمہ ماہی پروری اور ویٹرنری یونیورسٹی لاہور کے مابین تحقیقاتی سرگرمیوں کے فروغ کے لیے ایم او یو کی تجویز بھی ملتوی کر دی گئی ۔
اجلاس میں وزیر ہائر ایجوکیشن راجہ یاسر، ایڈیشنل چیف سیکریٹری داخلہ و متعلقہ محکموں کے سیکریٹریز نے شرکت کی ۔
سورس:وی این ایس، لاہور
