لاہور، 16 دسمبر(اے پی پی): وزیراعلیٰ پنجاب سردار عثمان بزدار سے بیرون ملک مقیم پاکستانیوں کے وفد نے جمعرات کو یہاں ملاقات کی ہے ،ملاقات میں اوورسیز پاکستانیوں کے مسائل اور سفارشات سے وزیر اعلیٰ کو آگاہ کیا۔
ملاقات میں وزیر اعلی عثمان بزدار نے اوورسیز پاکستانیوں کی قابل عمل تجاویز پر عملدرآمد کی یقین دہانی کروائی اور کہا کہ اوورسیز پاکستانی ہمارے بھائی ہیں، ان کے مسائل ترجیحی بنیادوں پر حل کئے جائیں گے،حکومت نے اوورسیز پاکستانیوں کو ووٹ کا حق دے کر ان کے دل جیت لئے ہیں۔
وزیر اعلیٰ پنجاب نے کہا کہ اوورسیز پاکستانی ہمارا اثاثہ ہیں، ماضی میں بیرون ملک مقیم پاکستانیوں کے مسائل سے پہلو تہی کی گئی۔سابق حکومتوں نے دعوے زیادہ اور کام کم کئے-
عثمان بزدار نے کہا کہ اوورسیز پاکستانیوں کو ووٹ کے حق کی مخالفت کر کے اپوزیشن جماعتوں نے اپنا دوغلہ چہرہ خودبے نقاب کیا۔ انہوں نے کہا کہ ہر سفارتخانے میں اوورسیز پاکستانیوں کو ایک کلک سے پنجاب میں درکار ریکارڈ مل جائے گا-
وفد کے ارکان نے گفتگو کرتے ہوئے کہا کہ اوورسیز پاکستانیوں کے مسائل کے حل میں ذاتی دلچسپی لینے پر وزیر اعلی عثمان بزدار کو خراج تحسین پیش کرتے ہیں۔بیرون ملک مقیم پاکستانیوں کو سہولتیں فراہم کرنے اور ان کے مسائل کے حل کے لئے حکومت پنجاب کے اقدامات قابل تحسین ہیں۔ وزیر اعلی عثمان بزدار نے اوورسیز پاکستانیوں کیلئے وزیر اعلیٰ آفس کے دروازے کھول دیئے ہیں ، عثمان بزدار کی خدمات کو قدر کی نگاہ سے دیکھتے ہیں –
اس موقع پر اوورسیزپاکستانی کمیشن پنجاب کے وائس چیئرمین مخدوم سید طارق محمود الحسن اور متعلقہ حکام بھی موجود تھے۔
سورس : وی این ایس ،لاہور
