ملتان، 09 جنوری(اے پی پی ): وزیراعظم کے معاون خصوصی برائے بین المذاہب ہم آہنگی علامہ طاہر محمود اشرفی نے کہا کہ تنازعات کے حل کے لیے مذاکرات بہترین آپشن ہیں۔یہ بات انہوں نے اتوار کو یہاں جنوبی پنجاب ملٹی سٹیک ہولڈر ورکنگ گروپ اور سگنائف آرگنائزیشن کے زیراہتمام بین المذاہب ہم آہنگی کے فروغ کے حوالے سے منعقدہ تقریب سے خطاب کرتے ہوئے کہی۔ تقریب کا بنیادی موضوع بین المذاہب ہم آہنگی کو برقرار رکھنے اور فروغ دینے کے طریقوں پر تبادلہ خیال کرنا تھا۔ علامہ طاہر اشرفی نے کہا کہ قوم کو انتہا پسندی کے خلاف کھڑا ہونا ہے،موجودہ حکومت مذاکرات کے ذریعے مسائل کے حل پر پختہ یقین رکھتی ہے۔انہوں نے مری واقعے پر افسوس کا اظہار کیا اور شہریوں سے اپیل کی کہ وہ مقتولین کی تصاویر سوشل میڈیا پر شیئر نہ کریں۔ انہوں نے اشارہ دیا کہ حکومت غفلت کے اظہار میں ملوث پائے جانے والے اہلکاروں کو سزا دے گی۔ علامہ طاہر محمود اشرفی نے شدید موسم کے دوران مری میں پھنسے ہوئے لوگوں کے لیے تیز رفتار خدمات انجام دینے پر پاک فوج کو خراج تحسین پیش کیا۔ انہوں نے پھنسے ہوئے لوگوں کی خدمت کے لیے مختلف دینی مدارس کی انتظامیہ کی طرف سے دکھائے جانے والے استقبالیہ انداز کی بھی تعریف کی ۔بین المذاہب ہم آہنگی کے فروغ میں دینی مدارس کے کردار پر ردعمل دیتے ہوئے وزیراعظم کے معاون خصوصی نے کہا کہ دینی مدارس کو وزارت تعلیم سے منسلک کیا جا رہا ہے۔انہوں نے اسلام آباد میں او آئی سی کے وزرائے خارجہ اجلاس کے انعقاد کو سراہا اور اسے حکومت اور وزارت خارجہ کی بڑی کامیابی قرار دیا کیونکہ پوری امت مسلمہ افغانستان کے مسئلے پر متحد ہے۔علامہ طاہر اشرفی نے کہا کہ اسلام میں جبری شادی کا کوئی تصور نہیں ہے ، اسلام عورت کو اپنی مرضی سے شادی کا حق دیتا ہے۔انہوں نے کہا کہ پیغام پاکستان کا اصل پیغام امن ہے اور کسی کو دوسروں کے مسلک میں مداخلت نہیں کرنی چاہیے۔مدینہ مسجد کے بارے میں حکومتی نقطہ نظر سے متعلق سوال کے جواب میں علامہ طاہر محمود اشرفی نے کہا کہ حکومت نے اٹارنی جنرل کے ذریعے اپنا نقطہ نظر پیش کیا۔ تاہم انہوں نے اشارہ دیا کہ مسجد یا قبرستان کو بغیر کسی “شرعی” وجہ کے منہدم نہیں کیا جا سکتا۔پیغام پاکستان کی سفارشات کے بارے میں وزیراعظم کے معاون خصوصی علامہ طاہر محمود اشرفی نے کہا کہ پیغام پاکستان کی سفارشات کو آئین کا حصہ بنایا جائے گا۔ انہوں نے کہا کہ بابر اعوان سفارشات کو قانونی شکل دینے کے لیے کام کر رہے ہیں۔وفاقی پارلیمانی سیکرٹری برائے خزانہ زین قریشی نے اپنے آن لائن خطاب میں جنوبی پنجاب ملٹی سٹیک ہولڈر گروپ کی خطے میں امن کو فروغ دینے کی کوششوں کی تعریف کی۔سیمینار سے ڈائریکٹر جنرل پیغام پاکستان ڈاکٹر محمد ضیاء الحق، صوبائی پارلیمانی سیکرٹری اطلاعات و ثقافت ندیم قریشی، وی سی ویمن یونیورسٹی عظمیٰ قریشی، زین بلوچ اور دیگر اہم شخصیات نے خطاب کیا۔ ان کا کہنا تھا کہ بین المذاہب ہم آہنگی کے فروغ کے لیے جدوجہد کی حوصلہ افزائی کی جانی چاہیے۔
سورس؛وی این ایس، ملتان
