شکار پور ،27فروری (اے پی پی):وزیر خارجہ شاہ محمود قریشی نے کہا ہے کہ27فروری کی مناسبت سے دو پیغام دینا چاہتا ہوں، بھارتی وزیر اعظم نریندر مودی سوچ سمجھ کر پاکستان کی جانب نظر اٹھا نا اوردوسرا پیغام بلاول بھٹو زرداری کو دینا چاہتا ہوں کہ ہم بلاول سے 15 سال کا حساب مانگنے آئے ہیں۔
شکار پور میں سندھ حقوق مارچ کے دوران تحریک انصاف کے جلسے سے خطاب کرتے ہوئے وزیر خارجہ شاہ محمود قریشی کا کہنا تھا مودی نے تین سال پہلے جارحیت کی اور پاکستان کی سرحدوں پر حملہ کیا جس کا ہم نے بھرپور جواب دیا، ہم نے ابھی نندن کو چائے پلاکر واپس بھیجا،نریندر مودی سوچ سمجھ کر پاکستان کی طرف آنکھ اٹھانا، آج وہ نہیں جو تمہیں ساڑھیاں پیش کریں۔
بلاول بھٹو زرداری کے لیے اپنے پیغام میں شاہ محمود قریشی کا کہنا تھا کہ سنا ہے بلاول لانگ مارچ نکال رہے ہیں، وہ کہتے ہیں کہ ہم سے حساب لینے نکلے ہیں تو ضرور لو ہمارا حساب، ہمارا وزیراعظم عمران خان گھبراتا نہیں ہے۔ انہوں نے کہا ہے کہ کراچی کے لوگوں کو دن دیہاڑے گن پوائنٹ پر لوٹا جا رہا ہے، بلاول سے پوچھتا ہوں کہ کراچی میں بے امنی کا ذمہ دار کون ہے ، بلاول سے پوچھتا ہوں کہ ورکرز کو 30 ،30 ہزار روپے کس نے دیے ہیں؟۔ وزیر خارجہ شاہ محمود قریشی کا کہنا تھا کراچی سے نکلنے سے پہلے لوگ امن و امان سے متعلق سوال کریں گے، سروے کے مطابق 5 فیصد پنجاب کے لوگوں نے پیپلز پارٹی کو ووٹ دینے کا کہا ہے جبکہ خیبر پختونخوا کے بلدیاتی انتخابات میں پیپلز پارٹی کو ایک تحصیل کی سیٹ ملی۔
شاہ محمود قریشی کا کہنا تھا سندھ کے عوام کو کہتا ہوں کہ پیپلز پارٹی کا مقابلہ پی ٹی آئی کرے گی۔ بلاول بھٹو ساڑھے 3 سال کا حساب مانگنے اسلام آباد آ رہے ہیں اور ہم حساب دینے کے پابند ہیں۔ ہمارا دامن صاف ہے اور ہم حساب دینے سے نہیں گھبراتے۔ اگر گھبرانے والا ہوتا تو وزرات خارجہ کا عہدہ چھوڑ کر زداری کے منہ پر استعفیٰ نہ مارتا۔
وزیر خارجہ شاہ محمود قریشی نے کہا کہ کراچی میں جو صورتحال ہے اسکا ذمہ داری کون ہے، کراچی کے لوگوں کو دن دیہاڑے قتل کیا جا رہا ہے، ڈکیتیاں ہو رہی ہیں ،کراچی سمیت سند ھ میں حکومت اور انتظامیہ کس ہے، پولیس کس کے تابع ہے، امن او امان کو بحال کس نے کرنا ہے ، کراچی سے کچراٹھانے کی ذمہ داری کس کی ہے، کراچی والوں بلاول سے یہ سوالات ضرور پوچھنا، بلاول بھٹو پنجاب میں داخل ہونے سے پہلے سند ھ کے لوگوں کو ضرور جواب دینا کہ پیپلز پارٹی سندھ کے لوگوں کو مسائل سے کیوں نہیں نکال سکی،سندھ کے عوام کو ان کے حقوق کیوں نہ دئیے، سند ھ کے ہسپتالوں کی جو صورتحال ہے اس کے ذمہ دار یہاں کے حکمران ہیں، سندھ کے لوگوں کے حقوق سند ھ کے حکمران غضب کر رہے ہیں ۔
انہوں نے کہا ہے کہ سندھ سے میرا رشتہ کئی سالوں سے ہے اور میں سند ھ کے بچے بچے سے محبت کرتا ہوں، تھر پارکر کے لوگوں کو صحت کی سمیت بنیادی سہولیات سندھ حکومت نے نہیں دی، تھر پاکر کے لوگ اس بات کی گواہی دینگے ۔انہوں نے کہا وزیر اعظم عمران خان نے میری درخواست پر تھر پاکر کے لوگوں کو ہیلتھ کارڈ جاری کر دیا ہے، وزیر اعظم عمران خان سندھ کے ہر بچے کو ہر مزدور کو صحت کارڈ دینا چا ہتے ہیں۔ انہوں نے کہا ہے کہ شہریار خان مہر سندھ کے حقوق کی جنگ لڑ رہے ہیں۔
سورس:وی این ایس، اسلام آباد
