جدہ ،23 مارچ(اے پی پی ): قونصلیٹ جنرل آف پاکستان میں یوم پاکستان کے موقع پر پرچم کشائی کی تقریب کا انعقاد کیا گیا۔ قونصل جنرل خالد مجید نے پاکستان کے قومی ترانے کے پس منظر میں قومی پرچم لہرایا۔ بعد ازاں صدر مملکت عارف علوی اور وزیراعظم عمران خان کے خصوصی پیغامات پڑھ کر سنائے گئے۔
اس موقع پر اپنے خطاب میں قونصل جنرل نے دوست مملکت سعودی عرب کے ساتھ پاکستان کے مضبوط تعلقات پر روشنی ڈالی اور پاک سعودی تعلقات کو مزید مضبوط بنانے میں پاکستانی کمیونٹی کے کردار کو سراہا۔انہوں نے پاکستان کی تاریخ، جیو اسٹریٹجک محل وقوع، بھرپور انسانی اور قدرتی وسائل سے اس کی علاقائی اور عالمی اہمیت کو اجاگر کیا۔ اس بات پر روشنی ڈالی گئی کہ حکومت پاکستان ملک کو درپیش موجودہ چیلنجز سے آگاہ ہے اور اس نے پائیدار سماجی و اقتصادی ترقی کی بنیاد رکھنے کے لیے معاشی اور ساختی اصلاحات کا ایک جامع سیٹ اپنایا ہے۔
تقریب میں تحریک پاکستان کے ہیروز کے ساتھ ساتھ پاکستان کے قومی مقاصد، استحکام اور ترقی کے لیے اہم کردار ادا کرنے والوں کو زبردست خراج تحسین پیش کیا گیا۔پاکستان انٹرنیشنل سکولز،رحاب اور عزیزیہ کے بچوں نے تقریریں کیں اور ٹیبلوز پیش کیا۔
تقریب کا اختتام پاکستان کی خوشحالی کے لیے اجتماعی دعا کے ساتھ کیا اور کیک بھی کاٹا گیا۔
سورس:وی این ایس،اسلام آباد
