مری،08 جون (اے پی پی ): ریجنل ایمرجنسی آفیسر راولپنڈی ریسکیو 1122 ڈاکٹر عبدالرحمن نے اپنی ٹیم کے ہمراہ ریسکیو 1122 مری کا دورہ کیا۔ مری کے تمام ریسکیو اسٹیشنز، کنٹرول روم سمیت تمام شعبہ جات کا معائنہ کیا ۔ دورے کا بنیادی مقصد موسم گرما میں کسی بھی ہنگامی صورتحال پر قابو پانے کے لیے ریسکیو مری کی استعداد کار کو جانچنا اور دستیاب وسائل سے آگاہی کے ساتھ ساتھ ضروریات کا جائزہ لینا شامل تھا۔
موسم گرما کے دوران شہریوں کو بروقت ریسکیو سروس کی فراہمی کیلئے تشکیل دئیے گئے ایمرجنسی کور پلان پر انچارج ایمرجنسی آفیسر نے تفصیلی دستیاب وسائل پر بریفنگ دی۔
ریجنل ایمرجنسی آفیسر راولپنڈی ریسکیو 1122 ڈاکٹر عبدالرحمن نے تحصیل مری میں پیش آنے والے حادثات پر بہتر ایمرجنسی سروس مہیا کرنے کی ہدایات دیں ، اس کے علاوہ اپنی ٹیم کے ہمراہ گاڑیوں، بلڈنگ اور سٹاف کے ٹرن آؤٹ کا معائنہ بھی کیا اور عوام کو بروقت ایمرجنسی سروس کی فراہمی اور سٹیشن صفائی کے بارے میں بھی ہدایات جاری کیں ۔انہوں نے کہا کہ شہری ٹریفک قوانین پر مکمل عمل کریں تاکہ حادثات میں کمی آۓ، ریسکیو اہلکار شہریوں کے جان و مال کا تحفظ یقینی بناتے رہیں گے۔
ریجنل ایمرجنسی آفیسر نے مختلف یونین کونسل سے آئے ریسکیو والینٹیرز سے بھی ملاقات کی ۔ یاد رہے ریسکیو رضارکار کسی بھی ہنگامی صورتحال کو قابو پانے میں ریسکیو اہلکاروں کے ساتھ شانہ بشانہ امدادی کارروائیوں میں بھرپور حصہ لیتے ہیں۔
بعد اذاں ریجنل ایمرجنسی آفیسر نے انچارج ایمرجنسی آفیسر کے ہمراہ بروری کے مقام پر منعقد ہونے والی فیلڈ ایکسرسائز کا معائنہ بھی کیا،یاد رہے اس فیلڈ ایکسرسائز میں پنجاب کے مختلف اضلاح سے آۓ ہوۓ ریسکیو اہلکار بھرپور طریقے سےحصہ لے رہے ہیں۔اس موقع پر ڈاکٹر عبدالرحمن کا کہنا تھا کہ فیلڈ ایکسرسائز کروانے کا بنیادی مقصد کسی بھی بڑے سانحے کی صورت میں پیشہ ورانہ انداز میں امدادی کاروائیوں کو جاری رکھنا ہے۔
