سکھر،10جون ( اے پی پی) تعلیمی بورڈ کے زیر انتظام فرسٹ ایئر اور انٹر کے امتحانات شروع ہوگئے ہیں ، تعلیمی بورڈ کی جانب سے پہلا پرچہ فرسٹ ایئر کا انگلش کا لیا گیا اورسکھر،خیرپور اور گھوٹکی اضلاع میں 103 امتحانی مراکز قائم کئے گئے ہیں ، امتحانی مراکز میں 43 طلباء،27 طالبات اور 33 مشترکہ مراکز بنائے ئے جس میں فرسٹ ایئر اور انٹر کے 62 ہزار 587 طلباءو طالبات جبکہ32 ہزار 994 طلباءو طالبات فرسٹ ایئر اور 29 ہزار 593 طلباء و طالبات انٹر کے امتحانات دینگے۔
تعلیمی بورڈ کی جانب سے نقل کو روکنے کیلئے2 لیڈیز ٹیموں سمیت 21 چھاپہ مار ٹیمیں تشکیل دی گئی ہیں اور بورڈ امتحانات کے دوران دفعہ 144 کے نفاذ کی وزارت داخلہ کو سفارش کی گئی ہے۔اس سلسلے میں سیکریٹری تعلیمی بورڈ رفیق پلھ نےبتایا کہ تعلیمی بورڈ کی جانب سے امتحانات کے حوالے سے تمام انتظامات مکمل کئے گئے ہیں نقل کی روک تھام کیلئے موئثر اقدامات کئے جارہے ہیں۔
