لاہور ، 20جون (اے پی پی): وزیر اعلیٰ پنجاب حمزہ شہباز شریف کی زیر صدارت اجلاس میی سبزیوں کی پیداوار اور طلب کا جائزہ لیا گیا اور کاشتکاروں کو سہولت اور عوام کو اشیاء ضروریہ مقرر کردہ نرخوں پر فراہم کرنے کے لئے بڑے فیصلے کیے گئے ۔
وزیر اعلی حمزہ شہباز نے چھوٹے کاشتکاروں کو اخوت کی طرز پر آسان اور بلاسود قرضے دینے کیلئے جامع پلان طلب کیا اور ہدایت دی کہ اس ضمن میں بینک آف پنجاب سے بھی مشاورت کی جائے۔
اجلاس میں کاشتکاروں کا استحصال روکنے کے لئے پنجاب بھر کی مارکیٹ کمیٹیوں کی تشکیل نو کا فیصلہ بھی کیا گیا اور آکشن سپروائزری عملے کے فی الفور رد و بدل کا فیصلہ بھی کیا گیا۔
وزیر اعلی پنجاب نے کہا کہ مارکیٹ کمیٹیوں میں بہترین ہیومن ریسورس کو انڈکٹ کیا جائے۔انہوں نے سیکرٹری زراعت سے ایگری ریسرچ انسٹیٹیوٹ کی کارکردگی پر سوال بھی اٹھایا اور زرعی ریسرچ اداروں کی کارکردگی رپورٹ بھی طلب کر لی۔ وزیر اعلی پنجاب نے کہا کہ زرعی شعبے میں ریسرچ کے بغیر پیداوار میں اضافہ محض خواب ہے۔ انہوں نے کہا کہ زرعی ریسرچ اداروں نے گزشتہ برسوں جو کام کیا ہے، اس کے بارے میں جامع رپورٹ پیش کی جائے۔ ان اداروں میں نجی شعبے کے ماہرین کی خدمات بھی لی جائیں۔
حمزہ شہباز نے کہا کہ فصلوں کی انشورنس کا پلان بھی تیار کیا جائے۔آنے والے دنوں میں ٹماٹر اور پیاز کی قلت پر قابو پانے کیلئے امپورٹ کے لئے بر وقت اقدامات کئے جائیں۔انہوں نے ٹماٹر، پیاز اور دیگر اشیاء ضروریہ کی ارزاں نرخوں پر عوام تک فراہمی کے لئے ہنگامی بنیادوں پر کام کرنے کی ہدایت بھی دی۔
وزیر اعلی حمزہ شہباز نے لاہور سمیت پنجاب کی منڈیوں میں صفائی کے انتظامات اور دیگر سہولتوں کے بارے رپورٹ بھی طلب کی اور کہا کہ تاریخ کے ساتھ وڈیو اور تصاویر آج رات تک وزیر اعلی آفس بھجوائیں۔انہوں نے کہا کہ منڈیوں میں کاروبار کرنے والوں کے لیےسہولتیں بہتر بنائیں گے۔
اجلاس میں آڑھتی کے رول کو کم کرنے پر بھی غور کیا گیا۔صوبائی وزیر سردار اویس لغاری، ایم پی اے بلال یاسین، پولیٹیکل اسسٹنٹس، متعلقہ محکموں کے سیکرٹریز، کمشنر لاہورڈویژن اور اعلی حکام نے اجلاس میں شرکت کی۔
