اوکاڑہ،08جولائی( اے پی پی): ڈپٹی کمشنر زاہد پرویز وڑائچ نے کہا ہے کہ عیدالالضحیٰ کے موقع پر شہروں، قصبات اور دیہات میں بھی صفائی ستھرائی، قربانی کے جانوروں کی آلائشیں اٹھانے کے لئے جو ایکشن پلان بنایا گیا ہے اس پر سو فیصد عمل در آمد کو یقینی بنایا جائے گا، متعلقہ محکموں کے سربراہان اور عملہ عید کے دنوں میں ڈیوٹی پر موجود رہیں گے۔
ان خیالات کا اظہار انہوں نے ڈپٹی کمشنر آفس میں میڈیا بریفنگ کے دوران کیا۔ انہوں نے بتایا کہ ضلع میں 952افراد پر مشتمل ٹیمیں صفائی ستھرائی کے لئے موجود رہیں گی، ضلع کی تینوں تحصیلوں میں 56ہزار 7سو سے زائد پولی تھین بیگ لوگوں میں تقسیم کئے جائیں گے جو قربانی کے جانوروں کی آلائشیں ڈال کر اپنے گھروں کے باہر رکھیں گے جہاں سے متعلقہ سینٹری ورکرز اسے اٹھا کر محفوظ انداز میں شہر سے باہر لے جاکر تلف کریں گے۔
انہوں نے بتایا کہ ضلع میں صفائی ستھرائی کے لئے تمام سرکاری مشینری کو استعمال کرنے کے ساتھ ساتھ لوڈر رکشے اور وین کرایہ پر متعلقہ کارپوریشنز حاصل کریں گی، ضلع سمیت تحصیل اور میونسپل فراہم کرنیوالے تمام اداروں میں کنٹرول روم قائم کر دئیے گئے ہیں جو عید کے دنوں میں فعال رہیں گے اور مختلف شفٹوں میں سرکاری اہلکار یہاں پر ڈیوٹی سر انجام دیں گے۔
ڈپٹی کمشنر زاہد پرویز وڑائچ نے کہا کہ ہسپتالوں میں سپیشل ڈیوٹی روسٹرز جاری کئے گئے ہیں، ڈاکٹرز و پیرا میڈیکل سٹاف کی ڈیوٹیاں لگا دی گئی ہیں۔ انہوں نے کہا کہ عید پر متوقع بارش کے پیش نظر تمام میونسپل سروسز فراہم کرنیوالے اداروں کو ہدایات جاری کر دی گئی ہیں اور عملہ کی ڈیوٹیاں لگا دی گئی ہیں۔
انہوں نے کہا کہ مویشی منڈیوں کے علاوہ گلی محلوں،چوراہوں اور سڑکوں پر قربانی کے جانور فروخت کرنیوالوں کیخلاف سخت ایکشن لیا گیا ہے اب تک 26افراد کے خلاف مقدمات درج کروائے گئے ہیں ضلع میں سری پائے بھوننے،ہوائی فائرنگ،ون ویلنگ کرنے پر سخت پابندی ہے اور دفعہ 144کا نفاذ کیا جا چکا ہے۔
ڈپٹی کمشنر زاہد پرویز وڑائچ نے صحافیوں پر زور دیتے ہوئے کہا کہ لوگوں کو آگاہی دینے کے لئے میڈیا اپنا کردار ادا کرے ،صفائی ستھرائی کے سلسلہ میں عوام صفائی پر مامور عملہ سے تعاون کرے اور اگر کسی جگہ شکایت ہو تو کنٹرول روم سے رابطہ کریں تاکہ مسئلہ کو فوری حل کروایا جا سکے۔
