لاہور، 08 جولائی (اے پی پی): گورنر پنجاب محمد بلیغ الرحمن نے کہا کہ پاکستان اور بیلجیم کے درمیان دو طرفہ تعلقات وقت گزرنے کے ساتھ مضبوط ہورہے ہیں ،ملک کی معاشی ترقی کے لیے انڈسٹریز کو سہولیات دینا حکومت کی اولین ترجیح ہے۔
ان خیالات کا اظہار انہوں نے پاکستان میں تعینات بیلجیم کے سفیرفلپ برون چین سے گفتگو میں کیا، جنہوں نے جمعہ کو یہاں اس سے ملاقات کی، ملاقات میں دونوں ممالک کے درمیان تعلقات اور تجارت کو فروغ دینے کے حوالے سے تبادلہ خیال کیا گیا۔
گورنر پنجاب محمد بلیغ الرحمن نے کہا کہ صنعتوں کو بلا تعطل بجلی کی فراہمی کی کوشش کر رہے ہیں، ٹیکسٹائل سیکٹر کا یورپی ممالک میں پاکستانی برآمدات کے حوالے سے اہم کردار ہے۔انہوں نے کہا کہ یورپی یونین پاکستان کا اہم تجارتی شراکت دار ہے، جی ایس پی پلس سٹیٹس ملنے سے پاکستان کی یورپ میں برآمدات میں اضافہ ہوا ہے۔
فلپ برون چین نے کہا کہ پاکستان کیساتھ تجارتی تعلقات میں مزید وسعت کے خواہاں ہیں ۔
