کوئٹہ، 14 جولائی ( اے پی پی ): وزیراعظم محمد شہباز شریف کی زیر صدارت جمعرات کو بارشوں کی صورتحال کا جائزہ اجلاس منعقد ہوا، وزیراعلی بلوچستان میر عبدالقدوس بزنجو نے بھی بزریعہ ویڈیو لنک اجلاس میں شرکت کی ۔وزیراعلی کی جانب سے اجلاس کو بلوچستان میں بارشوں کی صورتحال ،نقصانات اور امدادی سرگرمیوں پر بریفنگ دی گئی۔
وزیراعلیٰ بلوچستان میر عبدالقدوس بزنجو نے کہا کہ شدید بارشوں سے بلوچستان کے بیشتر اضلاع متاثر ہوئے ہیں اورجانی نقصان کے ساتھ ساتھ املاک کو بھی نقصان پہنچا ہے جبکہ لوگوں کے گھر ،فصلیں ،ٹیوب ویل ،سولر سسٹم اور زرعی اراضی بری طرح متاثر ہوئی ہے ۔ اس حوالے سے صوبائی ادارے انتظامیہ اور پی ڈی ایم اے امدادی سرگرمیوں میں مصروف اور پوری طرح الرٹ ہیں۔وزیراعلیٰ نے کہا کہ اس وقت 30 ہزار خیموں کی فوری ضرورت ہے،این ڈی ایم اے نے اب تک 300 خیمے فراہم کیے ہیں۔
وزیراعظم محمد شہباز شریف نے صوبائی حکومت کی امدادی سرگرمیوں پر اطمینان کا اظہار کیا اور کہا کہ وزیراعلی بلوچستان کی قیادت میں متعلقہ صوبائی اداروں کی محنت اور کاوشیں قابل ستائیش ہیں۔وزیراعظم کی جانب سے حکومت بلوچستان کو بھرپور معاونت کی یقین دہانی کرائی گئی ۔ انہوں نے کہا کہ جلد بلوچستان کا دورہ کر کے صورتحال کا جائزہ لوں گا۔
