لاہور،24 اگست (اے پی پی): وزیر اعلی پنجاب چودھری پرویزالٰہی نے کہا ہے کہ سیلاب متاثرین کی بحالی کے لئے تمام اداروں کو متحرک کر دیا ہے ، سیلاب متاثرین کی بحالی کے لئے خصوصی امدادی پیکج کا اعلان کیا ہے۔
ان خیالات کا اظہار انہوں نے پاکستان تحریک انصاف کے رہنما و سابق وفاقی وزیر پرویزخٹک سے ملاقات میں کیا ، ملاقات میں باہمی دلچسپی کے امور اور سیاسی صورتحال پر تبادلہ خیال کیا گیا۔ اجلاس میں راجن پور، تونسہ، ڈی جی خان کے سیلاب زدہ علاقوں میں امدادی سرگرمیوں کے حوالے سے بھی بات چیت کی گئی۔
وزیر اعلیٰ پنجاب چودھری پرویزالٰہی نے گفتگو کرتے ہوئے کہا کہ متاثرہ علاقوں کو آفت زدہ قرار دے کر آبیانیہ اور مالیہ معاف کر دیا ہے۔ سیلاب متاثرین کے ساتھ کھڑے ہیں اور میں نے راجن پور اور تونسہ جاکر خود متاثرین سے ملاقات کی اور صورتحال کا جائزہ لیا۔ انہوں نے کہا کہ پنجاب حکومت نے متاثرین کی بحالی کے لئے ہر ممکن وسائل فراہم کئے ہیں،پاک فوج کی ٹیمیں بھی ریسکیو اینڈ ریلیف آپریشن میں سول انتظامیہ کی بھرپور مدد کر رہی ہیں، کور کمانڈر ملتان کا ذاتی طور پر شکریہ ادا کرتا ہوں اور پاک فوج کے تعاون کی دل سے قدر کرتے ہیں۔
چودھری پرویزالٰہی نے کہا کہ سیلاب متاثرین کی مدد کے لیے پولیس، انتظامیہ، پی ڈی ایم اے اور ریسکیو 1122 کی خدمات بھی لائق تحسین ہیں،پنجاب حکومت کی امدادی ٹیمیں بھی ہر متاثرہ شخص تک پہنچ رہی ہیں۔ انھوں نے کہا کہ یہ وقت سیاست سے بالاتر ہو کر مصیبت میں گھرے بہن بھائیوں کی مدد کرنے کا ہے۔
پرویز خٹک نے سیلاب متاثرین کی بروقت مدد پر چودھری پرویزالٰہی کی قیادت میں پنجاب حکومت کے اقدامات کی تعریف کی۔اس موقع پر چودھری وجاہت حسین اورسابق وفاقی وزیر مونس الٰہی بھی موجود تھے ۔
