ملتان،29 اگست (اے پی پی ): موٹروے سنٹرل 2 زون پر سفر کرنے والے ڈرائیورز کی جانب سے کی جانے والی خلاف ورزی پر سخت کارروائی کی جائے گی۔ موٹر وے سنٹرل II زون سیکٹر آفس میں زونل کمانڈر/ڈی آئی جی شاہد جاوید کی سربراہی میں میٹنگ کا انعقاد کیا گیا ۔اجلاس میں تمام بس کمپنیز کے مالکان اور موٹروے پولیس کے افسران و ملازمان نے شرکت کی۔
میٹنگ میں ڈی آئی جی شاہد جاوید نے انسپکٹر جنرل نیشنل ہائی ویز اینڈ موٹرویز پولیس خالد محمود کے احکامات بس کمپنیز کے مالکان تک پہنچائے، MC-II زون پر بغیر ڈیش بورڈ کیمرے اور ٹریکر والی بسوں کے خلاف کریک ڈاؤن کا آغاز کرتے ہوئے ڈی آئی جی نے کہا کہ بغیر ٹریکر اور ڈیش کیمرے والی پبلک ٹرانسپورٹ کا داخلہ موٹروے پر بند کر دیا جائے گا، تمام بس کمپنیز، بس ڈرائیورز کے حوالے کرنے سے پہلے ڈرائیورز کے اوقات اور آرام کو مانیٹر کریں۔ کنڈکٹرز/ اسٹیورڈز کو بھی بسوں میں سونے کی اجازت نہیں ہونی چاہیے، بلکہ انہیں ڈرائیور کی ڈرائیونگ پر نظر رکھنے کا ذمہ دار بنایا جانا چاہیے۔ انہوں نے کہا کہ ڈرائیورز کی پچھلی سیٹوں پر بیٹھے مسافروں کو بتایا جائے اگر ڈرائیور نیند کی حالت میں گاڑی چلاتے ہیں یا حد رفتار سے تجاوز کرتے ہیں تو موٹروے کے ہیلپ لائن نمبر پر اطلاع دیں۔
زونل کمانڈر نے مزید کہا کہ بسوں میں ڈیش کیمرے لگانے اور انہیں مانیٹر کرنے کا مقصد ڈرائیورز کو قانون کی پاسداری کروانا ہے تاکہ بس میں موجود مسافروں کی جان و مال کی حفاظت کو یقینی بنایا جا سکے۔
