ملتان،28 اگست (اے پی پی):موٹروے سنٹرل 2 زون بیٹ 23 موٹروے پولیس نے مسافر کا گمشدہ موبائل ڈھونڈ کر واپس کردیا۔کراچی سے فیصل آباد سفر کرنے والا محمد امین موبائل جلالپور ریسٹ ایریا میں بھول گیا تھا۔موٹروے پولیس نے موبائل متعلقہ مسافر کو واپس کر کے ایمان داری اور فرض شناسی کی ایک اور مثال قائم کر دی ہے۔
مسافر نے سیکٹر -1, بیٹ 23 کی پٹرولنگ موبائل ٹائیگر 3 کو 740 نارتھ لوکیشن شجاع آباد انٹرچینج کے قریب روک کر جلالپور ریسٹ ایریا میں موبائل جس کی مالیت 27000 تھی کی گمشدگی اور اپنی پریشانی کے بارے میں بتایا جس پر ایکشن لیتے ہوئے پٹرولنگ کار پر ڈیوٹی پر مامور پیٹرول آفیسر لیاقت علی اور پیٹرول آفیسر عمیر طارق نے فوراً ڈی ایس پی بیٹ 23 مسرور علی اور وائرلیس آپریٹر کو اطلاع دی۔ ڈی ایس پی مسرور علی نے فوراً ریسٹ ایریا کے ٹھیکیدار کو کال کرکے گمشدہ موبائل کے بارے بتایا اور پٹرولنگ پر مامور افسران کو ہدایات دی کہ مسافر کو لیکر ریسٹ ایریا پہنچیں۔ جس پر عملدرآمد کرتے ہوئے مسافر کو ریسٹ ایریا لے گئے اور موبائل ڈھونڈ کر مسافر کو واپس کر دیا۔
متعلقہ مسافر نے موٹروے پولیس افسران کا بروقت کارروائی پر شکریہ ادا کیا جسکے بعد اسے دوسری بس پر فیصل آباد روانہ کر دیا گیا۔
سیکٹر کمانڈر رانا محمد اسماعیل نے دونوں افسران کو تعریفی سرٹیفکیٹ دینے کا اعلان کیا اور کہا کہ فرض شناسی اور ایمانداری میں موٹروے پولیس کا کوئی ثانی نہیں ہے۔
