اوکاڑہ،11ستمبر(اے پی پی): ایڈیشنل ڈپٹی کمشنر فنانس اینڈ پلاننگ چوہدری طاہر امین نے کہا ہے کہ موجودہ حالات اس بات کے متقاضی ہیں کہ انسدادِ ڈینگی اقدامات کے لئے جتنی احتیاط اور اقدامات کئے جا سکتے ہیں ان کو ترجیح اول بنایاجائے، انسداد ڈینگی اقدامات میں کسی سطح پر بھی کوتاہی اور ایس او پیز کی خلاف ورزی، مشکلات اور مسائل پیدا کر سکتی ہیں۔
ان خیالات کا اظہار انہوں نے انسداد ڈینگی کمیٹی کے جائزہ اجلاس کی صدارت کرتے ہوئے کیا۔ایڈیشنل ڈپٹی کمشنر فنانس اینڈ پلاننگ چوہدری طاہر امین نے کہا کہ ہمیں ویکٹر سر یلینس اور انسداد ڈینگی اقدامات کے لئے احتیاطی تدابیر اختیار کرنے میں کسی سطح پر بھی سمجھوتہ نہیں کرنا چاہیے، ہاٹ سپاٹس کی نگرانی اور ویکٹر سر ویلینس سب سے اہم اور ضروری کام ہے جس کے لئے تمام متعلقہ افراد بھر پور کاوشیں کریں۔انہوں نے کہا کہ انسداد ڈینگی اقدامات میں کسی سطح پر بھی کسی مشکل کے حل کے لئے ڈپٹی کمشنر آفس متعلقہ ڈیپارٹمنٹس کی رہنمائی اور معاونت کے لئے تمام وسائل بروئے کار لایا ہے۔
اس موقع پر سی ای او ہیلتھ ڈاکٹر مہار اختر حسین نے بتایا کہ ضلع میں اس وقت ڈینگی کے 17 کیسز ہیں جن میں سے 14 امپورٹڈ کیس ہیں جبکہ مریضوں کی دوسرے شہر سے آمد کے لئے معلومات حاصل کی جا رہی ہیں اس وقت ڈسٹرکٹ ہیڈ کوآرٹر ہسپتال میں 2 مریض ہیں۔
اجلاس کو بتایا گیا کہ ضلع میں 1 ہزار 904 ٹی میں ویکٹر سر ویلینس کے لئے کام کر رہی ہیں، 586 ہاٹ سپاٹس کی نگرانی کی جا رہی ہے۔
سی او او ہیلتھ ڈاکٹر مہار اختر حسین نے کہا کہ اس وقت ضرورت اس امر کی ہے کہ ہم اپنےگھروں ،دفاتر ،گلی ،محلوں کو صاف ستھرا اورخشک رکھیں، گھروں میں ائیر کولر ،فریج ٹرے کی صفائی روزانہ کی بنیاد پر کریں اور ائیر کنڈیشن کے پانی کو محفوظ انداز میں ٹھکانے لگانے کے انتظامات کریں تاکہ مچھروں کی افزائش کے امکانات کو کم سے کم سطح پر رکھا جا سکے۔
اجلاس میں ڈسٹرکٹ ہیلتھ آفیسر ڈاکٹر سجاد گیلانی،سی ڈی سی آفیسراصغر علی، ایم ایس ڈی ایچ کیو سٹی ہسپتال ڈاکٹر شاہد سلیم، ایم ایس ڈی ایچ کیو ساؤتھ سٹی ڈاکٹر ذوالفقار حیدر، ایجوکیشن افسران، ڈسٹرکٹ آفیسر پاپولیشن ویلفئیر سپیشل برانچ سمیت تمام ممبران انسداد ڈینگی کمیٹی کے ضلعی سر براہان نے شرکت کی۔
