لاہور ، 17ستمبر (اے پی پی): گورنر پنجاب محمد بلیغ الرحمان سے پاکستان میں سپین کے نئے تعینات ہونے والے سفیر ہوسے اے ڈی اوری (Jose A.d Ory) نے ہفتہ کو یہاں ملاقات کی ہے ، ملاقات میں دو طرفہ تجارت اور ثقافتی تعلقات کو مزید فروغ دینے پر اتفاق کیا گیا۔ ہسپانوی سفیر نے گفتگو کرتے ہوئے کہا کہ پاکستان کے ساتھ ثقافتی تعلقات کو فروغ دیں گے ۔
گورنر پنجاب محمد بلیغ الرحمان نے پاکستان کے لیے جی ایس پی پلس سکیم میں سپین کے کردار کا شکریہ ادا کیا۔ انہوں نے کہا کہ امید ہے سپین یورپین یونین میں جی ایس پی پلس سٹیٹس کے معاملے میں پاکستان کی حمایت جاری رکھے گا۔
گورنر پنجاب نے یورپی یونین میں باسمتی چاول کی جی آئی ٹیگنک کے مسلے پر سپین کے کردار کو سراہا۔ انھوں نے کہا کہ سپین پاکستان کا یورپین یونین میں تیسرا بڑا تجارتی شراکت دار ہے۔
گورنر پنجاب نے کہا کہ سیلاب متاثرین کی مدد کے لیے سپین کے تعاون کو قدر کی نگاہ سے دیکھتے ہیں، پاکستان کا موسمیاتی تبدیلیوں میں کردار کم جبکہ نقصان زیادہ ہوا ہے جبکہ ماحول کو نقصان پہنچانے والی گیسوں کے اخراج میں پاکستان کا حصہ بہت کم ہے۔
ہسپانوی سفیر نے گورنر پنجاب سے اتفاق کرتے ہوئے کہا کہ موسمیاتی تبدیلیوں کے ذمہ دار ممالک کو اس موقع پر پاکستان کی خصوصی طور پر مدد کرنی چاہیئے۔
