عارف والا،09 اکتوبر (اے پی پی ):جشن عید میلاد النبیﷺ کے سلسلہ میں مشعل بردار جلوس جماعت اہلسنت عارفوالا کے زیر اہتمام جامع مسجد ڈی بلاک سے زیر قیادت جماعت اہلسنت پنجاب آرگنائزر سید خلیل الرحمان بخاری نکالا گیا۔ جلوس میں بیت اللہ شریف ، روضہ رسول ﷺ اور نعلین مبارک والے ماڈلز بھی موجود تھے۔
جلوس میں عاشقان رسول ﷺ نے ہاتھوں میں سبز پرچم اور بینرز اٹھا رکھے جن پر آمد مصطفےﷺ کی تحریریں درج تھیں۔ جلوس مختلف بازاروں سے گزر کر جناح چوک سے ہوتا ہوا بلدیہ کے سبزہ زار گرائونڈ میں تقریب منعقد ہوئی جہاں پر نامور مقرر نے شرکاء سے خطاب کرتے ہوئے کہا کہ نبی اکرم نور مجسم حضرت محمد عربی ﷺ اس ماہ مقدس میں تمام جہانوں کے لئے رحمت بن کر آئے آپ ﷺ کی سیرت طیبہ بہترین مشعل راہ اور آپﷺ کی حیات مبارکہ بہترین نمونہ ہے۔
انہوں نے کہا کہ نبی اکرم روح القب سینہﷺ نے ہمیشہ اخوت ،بھائی چارے اور رواداری کا درس دیا ہمیں بھی سرکار مدینہﷺ کے بتائے ہوئے احکامات پر عمل کر کے دنیا و آخرت کو کامیاب بنانا ہوگا۔
