فیصل آباد،12اکتوبر (اے پی پی):قومی اسمبلی کے حلقہ این اے 108فیصل آبادمیں ضمنی انتخاب کیلئے پولنگ 16 اکتوبر کو ہوگی جس میں کل 5لاکھ 5ہزار 186ووٹرز کیلئے 354پولنگ سٹیشنز اور 1084پولنگ بوتھ قائم کیے جائیں گے۔
الیکشن کمیشن آف پاکستان فیصل آباد کے ریٹرننگ آفیسر حلقہ این اے 108فیصل آباد و ڈسٹرکٹ الیکشن کمشنر II عرفان کوثر نے اے پی پی کو بتایاکہ مذکورہ حلقہ میں ضمنی انتخاب کیلئے پولنگ 16 اکتوبربروز اتوارکو صبح 8 سے بغیر کسی وقفہ کے شا م 5 بجے تک جاری رہے گی۔انہوں نے بتایا کہ قومی اسمبلی کے حلقہ این اے 108 فیصل آبادکے ضمنی انتخاب میں کل 5لاکھ 5ہزار 186ووٹرز حق رائے دہی استعمال کریں گے جن کیلئے 354پولنگ سٹیشنز اور1084پولنگ بوتھس قائم کئے جائیں گے۔انہوں نے بتایا کہ مذکورہ حلقہ میں منعقد ہونے والے ضمنی انتخاب میں 271039مرد اور 234147خواتین ووٹرز حق رائے دہی استعمال کریں گی۔انہوں نے بتایاکہ پولنگ کیلئے 164مردانہ،160زنانہ،29مشترکہ سمیت کل 353پولنگ سٹیشن قائم کئے گئے ہیں۔
عرفان کوثر نے بتایا کہ کہ ان پولنگ سٹیشنز میں مردوں کیلئے 559اور خواتین کیلئے 527سمیت کل 1086پولنگ بوتھ بنائے جائیں گے تاکہ ووٹرز پر سکون ماحول میں اپنا حق رائے دہی استعمال کر سکیں۔ انہوں نے بتایا کہ مذکورہ حلقہ میں پولنگ کے خوشگوار ماحول میں انعقاد کیلئے 372 پریذائیڈنگ آفیسر ز، 1138 اسسٹنٹ پریذائیڈنگ آفیسر ز، 1138 پولنگ آفیسر ز اور 372 نائب قاصد اپنے فرائض سر انجام دیں گے جن میں 5 فیصد ریزرو سٹاف بھی شامل ہے۔
عرفان کوثر نے بتایا کہ قومی اسمبلی کے حلقہ این اے 108فیصل آباد VIIIمیں ضمنی انتخاب کیلئے پی ٹی آئی کے عمران احمد خان نیازی (بلا)، مسلم لیگ ن کے عابد شیر علی (شیر)، آزاد امیدوار فرخ حبیب (سکوٹر)، ارسلان ارشد آزاد امید وار(لاؤڈ سپیکر)، پاکستان نظر یاتی پارٹی کے امید وار خرم شہزاد(ریلوے انجن)، آزاد امید وار رضوان محمود(ٹریفک سگنل)، مو و آن پاکستان پارٹی کے امید وار سہیل کاشف (شتر مرغ)، آزاد امید وار شہباز علی گلزار(مٹکا)، آزاد امید وار عبدالحفیظ(بیل)،آزاد امیدوار لیاقت علی(کرکٹ وکٹ)، تحریک لبیک پاکستان کے امید وار محمد صدیق(کرین) اور آزاد امید وار ملک محمد علی طاہر(ایکسکیویٹر)سمیت12 امیدوار مدمقابل ہیں۔
