لاہور,28نومبر (اے پی پی):وزیر اعظم کے معاون خصوصی برائے صنعت و پیداوار تسنیم احمد قریشی نے کہا ہے کہ ملک میں معاشی استحکام سیاسی استحکام سے مشروط ہے، غیر یقینی سیاسی صورتحال کی وجہ سے 80 فیصد صنعتیں سست روی کا شکار ہیں،کاروباری برادری کے پاس پیسہ ہے مگر سرمایہ کاری نہیں ہو رہی، ملک میں زیادہ تر سرمایہ کاری رئیل سٹیٹ میں ہو رہی ہے۔وہ پیر کے روز یہاں سمال اینڈ میڈیم انٹر پرائزز اتھارٹی (سمیڈا) آفس میں میڈیا سے گفتگو کر رہے تھے۔معاون خصوصی نے کہا کہ موجودہ حکومت تاجر برادری کے لیے سازگار ماحول پیدا کر رہی ہے اس لیے سمیڈا جیسے اداروں کو زیادہ فعال بنانے کے لئے کوششیں کر رہے ہیں۔انہوں نے کہا کہ بیرونی سرمایہ کاروں کے ساتھ ساتھ مقامی سرمایہ کاروں کی بھی حوصلہ افزائی کرنا چاہتے ہیں۔انہو ں نے کہا کہ حکومت مقامی سرمایہ کاروںکو بھی سہولیا ت کی فراہمی یقینی بنار ہی ہے تاکہ ریئل سٹیٹ کی بجائے مقامی انڈسٹری میں سرمایہ کاری ہو اور لوگوں کو زیادہ سے زیادہ روزگار کے مواقع میسر آئیں۔انہوں نے کہا کہ حکومت کی جانب سے اس وقت بہت زیادہ تعداد میں ملازمتیں ممکن نہیں تاہم یہ کام صرف کاروبار اور صنعتوں کو فروغ دے کر ہی ممکن بنایا جاسکتا ہے ،چونکہ سمیڈا چھوٹے اور درمیانے درجے کی صنعتوں اور کاروبار کی ترقی میں کلیدی کردار کا حامل ادارہ ہے اس لیے میں نے بطور معاون خصوصی اپنی کوششوں کا آغاز یہیں سے کیا ہے۔انہوں نے کہا کہ معاون خصوصی نامزدگی پر میں وزیر اعظم محمد شہباز شریف اور چیئرمین پی پی پی بلاول بھٹو زرداری کا مشکور ہوں۔قبل ازیں چیف ایگزیکٹو آفیسر سمیڈا ہاشم رضا نے معاون خصوصی برائے صنعت و پیداوار تسنیم احمد قریشی کو سمیڈا کی خدمات اور ترقیاتی منصوبوںبارے بریفنگ دی اور بتایا کہ آئندہ صنعتی اور کاروباری ترقی کے لیے سمیڈا نے 11کاروباری شعبوں کی نشاندہی کی ہے جن میں انفارمیشن ٹیکنالوجی ،ٹوورازم، ڈیری اینڈ لائیو سٹاک اور ای کامرس سمیت دیگر شعبہ جات شامل ہیں۔انہوں نے کہا کہ سمیڈا کی جانب سے کاروبار کو ترقی دینے کے لیے دسمبر میں کاروباری منصوبوں کے ملک گیر مقابلے منعقد کیے جارہے ہیں جن میں جدید اور منفرد منصوبوں کو مالی انعامات کے ساتھ ساتھ گرانٹ اور تمام ضروری سہولتیں بھی فراہم کی جائیں گی۔اس موقع پر جنرل مینیجر بزنس ڈویلپمنٹ سیکٹر محمد اشفاق، جی ایم پالیسی اینڈ پلاننگ اور ہیڈ آف فنانس محمد رضا سمیت دیگر بھی موجود تھے۔
