لاہور۔17جنوری (اے پی پی):وزیراعلی پنجاب چودھری پرویز الہی نے کہا ہے کہ دین کے فروغ کے کام کو جاری وساری رکھیں گے، پارٹی ضم کرنے والی کوئی بات نہیں، مشاورت جاری ہے،پارٹی ضم کرنے کے حوالے سے کوئی حتمی رائے قائم نہیں ہوئی اورنہ ہی کوئی فیصلہ ہوا ہے۔ وہ منگل کے روز لاہور میں داتا دربار پارکنگ پلازہ، انڈر پاس اورانفراسٹرکچر کی بحالی کے پراجیکٹ کا سنگ بنیاد رکھنے کی تقریب سے خطاب کر رہے تھے ، وزیراعلی پنجاب نے کہا کہ گزشتہ روز مسلم لیگ قائد اعظم کے اجلاس کے تمام شرکاء نے کہاہے کہ ہمیں اپنے حلقوں میں جا کر لوگوں سے مشاورت کرنی ہے،اس کے بعد کوئی فیصلہ کیاجائے گا۔وزیراعلی نے کہاکہ بلاشبہ عمران خان ہمارے لیڈر ہیں،عمران خان نے مجھ پر اعتماد کیا اور مجھے وزیراعلی الیکٹ کرایا،میں ان کا یہ احسان کیسے بھول سکتا ہوں ۔انہوں نے کہاکہ خاتم النبین یونیورسٹی میں دین کی ترویج کرنے والے بزرگان دین کی خدمات پر ریسرچ کی جائے گی،حضرت علی ہجویری داتا گنج بخش اوربابا فرید الدین گنج شکر سمیت بزرگان دین پر تحقیقی کام کی ڈگری متعارف کرائیں گے،رائیونڈ دین کی خدمت کرنے کی بہترین جگہ ہے،داتا دربار اورپاکپتن بابا فرید الدین گنج شکرمزار کے احاطے میں فولڈنگ چھتریاں لگائی جائیں گی اورفوڈ اتھارٹی مزارات میں لنگر کے معیار کو یقینی بنائے گی۔انہوں نے کہاکہ پارکنگ پلازہ میں بزرگ اورمعذور زائرین کے لئے لفٹیں لگائی جائیں گی،عرس پر سڑکیں بند کرنے سے دقت ہوتی ہے،بہتر انفراسٹرکچر بنانا چاہتے ہیں،پارکنگ پلازہ سے زائرین گاڑی کھڑی کر کے انڈر گرائونڈ راستے سے پیدل مزارتک جا سکیں گے۔انہوں نے کہا کہ امریکہ،کینیڈا اور دیگر ممالک سے آنے والے زائرین کو سہولتیں اور آسانیاں دیں گے،حضرت علی ہجویری داتا گنج بخش نے لاہور میں ترویج اسلام کا کام کر کے ہم سب پر احسان کیا،داتا دربار اورپاکپتن مزار میں تعمیر و توسیع کا پراجیکٹ راسخ الہی اورہم سب کی خواہش تھی،مزارات میں تعمیر وتوسیع سے زائرین کو براہ راست سہولیات دیں گے۔انہوں نے کہا کہ چند ماہ میں لاہو رکے لئے23ارب روپے کے 9 سے زائد گیم چینجر پراجیکٹ شروع کیے،لاہو رکو شیخوپورہ اور روڈا کی طرف سے کھول دیا ہے، راستے وسیع اور آسان ہوں گے۔قبل ازیں پرویز الہی نے داتا دربار پارکنگ پلازہ، انڈر پاس اورانفراسٹرکچر کی بحالی کے پراجیکٹ کا سنگ بنیاد رکھا۔انہوں نے کہا کہ داتا دربار پارکنگ پلازہ، انڈر پاس اور انفراسٹرکچر کی بحالی کے منصوبے پر مجموعی طورپر4ارب روپے سے زائد لاگت آئے گی اور یہ منصوبہ 6 سے 8ماہ میں مکمل ہوگا، پراجیکٹ کی تکمیل سے نہ صرف زائرین بلکہ داتا دربار،بلال گنج،بھاٹی گیٹ،اردو بازار، موری گیٹ، ٹیکسالی گیٹ، تعلیمی ادارے، ہسپتال اور دیگر ملحقہ علاقے کے عوام مستفید ہوں گے۔انہو ں نے کہا کہ پارکنگ پلازہ 2 بیسمنٹ اور 6 منزلہ ہوگا اور 500سے زائد گاڑیاں پارک کرنے کی سہولت ہوگی،انڈرپاس کے ذریعے پارکنگ پلازہ کو داتادرباربیسمنٹ سے منسلک کیاجائے گا۔ اس موقع پرڈی جی ایل ڈی اے نے منصوبے کے بارے میں بریفنگ دی جبکہ میاں اسلم اقبال، پیر سید سعیدالحسن شاہ، میاں رشید، حاجی شاہد حمید، اسلم ترین، سیکرٹری ہا ئوسنگ، سیکرٹری اوقاف، سیکرٹری تعمیرات و مواصلات، سیکرٹری اطلاعات، ایڈمنسٹریٹر داتا دربار اور متعلقہ حکام بھی موجود تھے۔
