ملتان،17 جنوری(اے پی پی ): کمشنر اشفاق احمد چوہدری نے کہا کہ ملکی تاریخ میں پہلی ڈیجیٹل مردم شماری، ساتویں خانہ و مردم شماری کا آغاز ہورہا ہے، جو یکم فروری تا 4 مارچ تک جاری رہے گی۔
ان خیالات کا اظہار کمشنر اشفاق احمد چوہدری نے زیر تربیت شمار کنندگان سے خطاب کرتے ہوئے کیا۔انہوں نے کہا کہ شمار کنندگان قومی فریضہ سرانجام دے رہے ہیں، شمارکنندگان، جواب دہندگان کے درمیان تعاون کامیاب مردم شماری کیلئے ناگزیر ہے۔انہوں نے کہا کہ پہلی پیپر لیس مردم شماری میں جیوٹیگنگ شامل ہے۔
اشفاق احمد چوہدری نے کہا جدید دور میں ٹیکنالوجی کی کلیدی کردار سے انکار ممکن نہیں، مردم شماری کو ملک کی منصوبہ بندی کیلئے اہم ذریعہ سمجھا جاتا ہے۔انہوں نے کہا کہ ملکی آبادی کی مستقبل کی ضروریات بارے مردم شماری کا کلیدی کردار ہے۔
اس موقع پر ڈائیریکٹر لوکل گورنمنٹ ظہور شاہ نے کہا کہ ڈویژن میں 5559 شمار کنندگان، 873 سپروائزر مردم شماری میں ڈیوٹی سرانجام دیں گے ، ڈویژن بھر میں مردم شماری کیلئے 9975 بلاک بنائے گئے ہیں۔
بریفنگ دیتے ہوئے بتایا گیا کہ ملک بھر میں 7ویں خانہ و مردم شماری پر 34 ارب روپے لاگت آئے گی ، ہر شہری پورٹل پر ڈجیٹل مردم شماری میں از خود اپنا ڈیٹا اپ لوڈ کر سکے گا۔
