لاہور۔21جنوری (اے پی پی):وزیراعلیٰ پنجاب چودھری پرویز الٰہی کی ہدایت پر وزیراعلیٰ آفس کے مرکزی کمیٹی روم میں ختم نبوت ﷺسے متعلق آیت اور حدیث مبارکہ آویزاں کر دی گئیں۔ وزیراعلیٰ آفس کے مرکزی کمیٹی روم میں سورہ الاحزاب کی آیت نمبر40 آویزاں کی گئی جس کا ترجمہ اور مفہوم ہے کہ ”حضرت محمدﷺمردوں میں سے کسی کے باپ نہیں ہیں لیکن وہ اللہ کے رسولﷺ اور تمام نبیوں میں سب سے آخری نبی ﷺہیں اور اللہ تعالیٰ ہر بات کو خوب جاننے والا ہے”۔ مرکزی کمیٹی روم میں عقیدہ ختم نبوتﷺ سے متعلق ترمذی شریف کی حدیت نمبر2219 بھی آویزاں کی گئی جس کے مطا بق رسول اللہﷺ نے فرمایا ” میں خاتم النبینﷺ ہوں، میرے بعد کوئی نبی نہیں ہوگا”۔وزیراعلیٰ چودھری پرویز الٰہی نے راسخ الٰہی کے ہمراہ کمیٹی روم کا دورہ کیا اور آویزاں آیت و حدیث مبارکہ کا معائنہ کیا۔وزیراعلیٰ نے جلی حروف میں آیت اور حدیث مبارکہ آویزاں کرنے پر اظہار تشکر کیا اور کہا کہ عقیدہ ختم نبوتﷺہمارے ایمان کا حصہ ہے، اس کے تحفظ کیلئے تمام تر اقدام کریں گے۔انہوں نے کہاکہ نکاح نامے میں عقیدہ ختم نبوتﷺکی شق شامل کرنے سے دھوکہ دہی کے واقعات کا سدباب ہوا جبکہ درسی کتب میں حضرت محمدﷺ کے نام مبارک سے پہلے خاتم النبین ﷺلکھنا لازمی قرار دیا ہے۔چودھری پرویز الٰہی نے مرکزی کمیٹی روم میں ختم نبوت سے متعلق آیت اور حدیث مبارکہ آویزاں کرنے پر ایکسیئن بلڈنگ مریم راٹھور اور ان کی ٹیم کو سراہا۔عامر سعید راں ،ہمیش خان ، خطیب جامع مسجد وزیر اعلی آفس قاری ساجد اور دیگر اس موقع پر موجود تھے۔
