لاہور، 13 جنوری (اے پی پی ): وزیراعلیٰ پنجاب چودھری پرویزالٰہی کا وکلاء برادری کی فلاح و بہبود کیلئے احسن اقدام، وزیراعلیٰ نے سپریم کورٹ بار ایسوسی ایشن کے صدر عابد زبیری کو سپریم کورٹ بار ایسوسی ایشن کیلئے 10کروڑ روپے کی گرانٹ کاچیک دیا۔
وزیراعلیٰ چودھری پرویزالٰہی سے سپریم کورٹ بار ایسوسی ایشن کے صدر عابد زبیری کی سربراہی میں وفد نے ملاقات کی ۔وفد نے وزیراعلیٰ چودھری پرویزالٰہی کا گرانٹ کیلئے شکریہ ادا کیا۔
اس موقع پر وزیراعلیٰ پنجاب چودھری پرویزالٰہی نے کہا کہ وکلاء برادری کی فلاح وبہبود کو ہمیشہ مقدم رکھا ہے، عام آدمی کو انصاف کی فراہمی کیلئے وکلاء برادری کا کردار مسلمہ ہے۔انہوں نے کہا کہ میرے دروازے آپ کیلئے ہمہ وقت کھلے ہیں، حکومت وکلاء برادری کو دست و بازو سمجھتی ہے۔
سپریم کورٹ بار ایسوسی ایشن کے صدر عابد زبیری نے کہا کہ وکلاء برادری کی فلاح وبہبود کیلئے مزید اقدامات بھی کئے جارہے ہیں، آپ کے دور میں وکلاء برادری کی فلاح و بہبودکیلئے حقیقی معنوں میں کام ہو رہا ہے، وکلاء برادری کو جتنی عزت اور احترام آپ نے دیا ہے اس کی مثال ماضی میں نہیں ملتی۔
ملاقات میں صوبائی وزیر قانون خرم شہزاد ورک، ایڈووکیٹ جنرل پنجاب احمد اویس، صوبائی مشیر عامر سعید راں، سینئر وکیل جہانگیر جھوجہ، سپریم کورٹ بارایسوسی ایشن کے سیکرٹری مقتدرشبیر، ممبر محسن بیگ، صائم چودھری، معروف ایڈووکیٹ حسان نیازی، صوبائی سیکرٹری قانون اور دیگر وکلاء بھی اس موقع پر موجود تھے۔
