لاہور،13جنوری(اے پی پی):وزیراعلی پنجاب چودھری پرویز الہی نے کہا ہے کہ پنجاب حکومت بلوچستان کو 21ہزار میٹرک ٹن گندم فراہم کرے گی، بلوچستان نے پنجاب حکومت سے 10ہزار میٹرک ٹن گندم دینے کی درخواست کی اور ہم نے اپنے بھائی کو ضروریات سے زیادہ 21ہزار میٹرک ٹن گندم دینے کا فیصلہ کیا۔
وزیراعلی چودھری پرویزالہی کی زیر صدارت وزیراعلی آفس میں صوبائی کابینہ کمیٹی برائے گندم کا اجلاس منعقد ہوا جس میں گندم کے ذخائر اورآٹے کی قیمتوں کا جائزہ لیاگیا۔ اجلاس میں چکی مالکان کو سرکاری سطح پر گندم کی فراہمی کی تجویز پرغور کیا گیا۔ وزیراعلی پنجاب چودھری پرویز الہی نے کہا کہ پنجاب بڑے بھائی کی حیثیت سے دیگر صوبوں کا خیال رکھے گا۔ انہوں نے کہا کہ گندم مافیا کے خلاف کارروائی میں زیروٹالرنس کی پالیسی اپنائی جائے گی، گندم کی سمگلنگ روکنے کیلئے تمام خارجی راستوں پر پولیس کی اضافی نفری تعینات کی جائے گی۔وزیراعلی نے انسپکٹر جنرل پولیس اور ایڈیشنل چیف سیکرٹری داخلہ کو خارجی راستوں کی کڑی نگرانی کیلئے مربوط پلان پر عملدر آمد کی ہدایت کی۔
وزیراعلی کو دوران بریفنگ بتایا گیا کہ گندم کی سمگلنگ کے الزام میں 1541ایف آئی آر اور 39ملین روپے جرمانہ کیاگیا جبکہ سستے آٹے کی فراہمی کیلئے سیل پوائٹنس کی تعداد 1059سے بڑھا دی گئی ہے۔ سیکرٹری خوراک نے گندم کے ذخائر اورآٹے کی قیمتوں کے بارے میں بریفنگ دی۔
صوبائی وزیر خوراک سردار حسنین بہادر دریشک، صوبائی وزیر زراعت سید حسین جہانیاں گردیزی، چیف سیکرٹری عبداللہ خان سنبل، پرنسپل سیکرٹری وزیراعلی محمد خان بھٹی،سابق پرنسپل سیکرٹری وزیراعلی جی ایم سکندر، سابق صدر بینک آف پنجاب ہمیش خان، ماہر اقتصادیات محمد ساجد، سیکرٹری زراعت احمد عزیز تارڑ،سیکرٹری خوراک نادر چٹھہ، ڈائریکٹر فوڈ شوزب سعید اور متعلقہ حکام نے اجلاس میں شرکت کی۔
