کوئٹہ،05 فروری(اے پی پی): پی ایس ایل کے نمائشی میچ کی اختتام تقریب کے مہمان خصوصی وزیراعلی بلوچستان میر عبدالقدوس بزنجو نے کامیاب کھلاڑیوں اور ٹیموں میں انعامات تقسیم کرتے ہوئے کہا کہ آج کسی ٹیم کی نہیں بلکہ پاکستان، بلوچستان اور کشمیر کاز کی فتح ہوئی ہے،میچ کو کامیاب بنانے کیلئے بلوچستان کے عوام، پی سی بی، کھلاڑیوں اور سیکیورٹی فورسز سب نے اپنا کردار ادا کیا۔ انہوں نے کہا کہ میچ کا کامیاب انعقاد اور اختتام ملک دشمن عناصر کیلئے واضع پیغام ہے اب بلوچستان میں امن آچکا ہے اور عوام اب بد امنی پھیلا نے کی کوشش کرنے والوں کو برداشت نہیں کرینگے اور اب بلوچستان میں کر کٹ کے دروازے کھل گئے ہیں۔
وزیراعلی بلوچستان نے کہا کہ پولیس، محکمہ داخلہ، انتظامیہ اور ایف سی کی کارکردگی قابل تحسین رہی، سیکیورٹی اداروں نے دن رات محنت کر کے پر امن ماحول میں میچ کا انعقاد یقینی بنایا اور بلوچستان کے عوام کا شکریہ کہ انہوں نے امن کے قیام میں بنیادی کردار ادا کیا۔
وزیر اعلی نے کہا کہ پی سی بی سے کہوں گا کہ کوئٹہ میں کر کٹ مقابلوں کا مسلسل انعقاد کیا جاۓ،قومی کر کٹ ٹیم کے کھلاڑیوں کا مشکور ہوں کہ انہوں نے بین القوامی میچوں پر کوئٹہ کے میچ کو ترجیح دی۔
