کوئٹہ، 14 فروری (اے پی پی ): چیف سیکریٹری بلوچستان عبدالعزیز عقیلی کی زیر صدارت منگل کو یہاں سیکریٹریز کمیٹی کا اجلاس منعقد ہوا،اجلاس میں سیکرٹری صحت صالح ناصر نے اجلاس کو محکمانہ امور پر بریفنگ دی اور بتایا کہ فرائض سے غفلت کے مرتکب 6 ڈاکٹروں کو ملازمت سے برخواست کر دیا گیا ہے۔
سیکریٹری صحت نے اجلاس میں کہا کہ 57 ڈاکٹروں کے خلاف انضباطی کارروائی شروع کی گئی ہے اور سرکاری ڈیوٹی سرانجام دینے کے بجائے نجی پریکٹس کرنے والے40 ڈاکٹروں کو شو کاز نوٹس جاری کر دیئے گئے ہیں۔
اجلاس میں سیکریٹری صحت نے پوسٹ گریجوئٹ ڈاکٹرز کے حوالے سے پالیسی کا مسودہ پیش کیا۔اجلاس میں فیصلہ کیا گیا کہ دور دراز علاقوں میں ڈیوٹی دینے والے پوسٹ گریجوئٹ ڈاکٹروں کو اضافی الاؤنس دیا جائے،دشوار گزار علاقوں میں تعینات پوسٹ گریجوئٹ ڈاکٹروں کو ایک سے دو سال کی ٹریننگ دینے کا بھی جائزہ لیا گیا اور پوسٹ گریجوئٹ ڈاکٹرز کیلئے اپنے علاقوں میں کم ازکم تین سال تعیناتی لازم ہو گی۔
