کراچی۔28فروری (اے پی پی):کومبیکس روشن خان نیشنل ٹیم سکوائش چیمپئن شپ کل بروز بدھ سے پاکستان نیوی روشن خان جہانگیر خان سکوائش کمپلیکس کراچی میں شروع ہو گی۔پانچ روزہ ایونٹ میں مردوں کے مقابلوں میں سات ٹیمیں پاکستان واپڈا، پاکستان آرمی، پاکستان نیوی،خیبرپختونخوا، پنجاب، سندھ اوربلوچستان جبکہ خواتین کے ایونٹ میں پانچ ٹیمیں واپڈا، آرمی، سندھ، پنجاب اور بلوچستان کی ٹیمیں حصہ لیں گی، فائنلز 5 مارچ کوکھیلے جائیں گے۔ ایونٹ کی تفصیلات کے حوالے سے منعقدہ میڈیا بریفنگ میں صحافیوں سے بات کرتے ہوئے چیمپئن شپ کے آرگنائزنگ سیکرٹری لیفٹینٹ کمانڈر رحمت اللہ کاکہنا تھا کہ آخری بار روشن خان چیمپئن شپ 2017 میں کھیلی گئی تھی، چھ سال کے وقفے کی وجہ سے کچھ مشکلات درپیش ہیں۔ اس موقع پر موجود سابق عالمی چیمپئن جہانگیر خان نے کہا کہ سکوائش میں نئے ٹیلنٹ کی تلاش میں ایونٹس کاتواترسے جاری رہنا ضروری ہے، ڈیپارٹمنٹل ٹیموں کے خاتمے کے باعث بھی چند اداروں کی ٹیمیں ایونٹ میں شرکت نہیں کررہی ہیں تاہم ایئر فورس کی ٹیم کا ایونٹ میں نہ ہونا حیران کن ہے، موجودہ حالات میں کومبیکس اسپورٹس اسکوائش کو اپنے پیروں پر کھڑا کرنے میں بہت اہم کردار اداکررہی ہے۔ ایک سوال کے جواب میں جہانگیر خان کا کہنا تھا کہ آج کے کھلاڑی دستیاب سہولتوں سے درست فائدہ نہیں اٹھاتے، مستقبل کے جہانگیر خان بننے کے لئے بہت محنت اور سہولتوں کا درست استعمال ضروری ہے، پرفارم کرنے والا ہر صورت پرفارم کرتا ہے،سکوائش میں اپنے معیار کا خیال رکھنا ہوگا جبکہ فیڈریشن کو پروفیشنل انداز سے کام کرنا چاہیے، اس وقت اسکوائش فیڈریشن کو کوئی پوچھنے والا نہیں ہے، ملک میں چند ایسے لوگ اسکوائش چلارہے ہیں جن کا اس کھیل سے تعلق نہیں۔ ایونٹ کے اسپانسر کومبیکس اسپورٹس کے سی ای اے عمر سعید کاکہنا تھا کہ کہ جہانگیرخان سکوائش کے کھلاڑیوں کیلئے رول ماڈل کی حیثیت رکھتے ہیں، ہمارا مقصد گراس روٹ لیول سے اس کھیل کو فروغ دینا اور نئے ٹیلنٹ کو اجاگر کرنا ہے تاکہ ہمارا ملک بین الاقوامی سطح پر سکوائش کی کھوئی ہوئی شان کو دوبارہ حاصل کر سکے۔ اس موقع پر آرگنائزنگ کمیٹی کے وائس چیئرمین زبیر ماچا، ڈائریکٹر طاہر جمیل خانزادہ اور چیمپئن شپ ریفری نوید عالم بھی موجود تھے۔
