اوکاڑہ،07مارچ (اے پی پی):ووکیشنل ٹریننگ انسٹی ٹیوٹ میں دوروزہ رنگا رنگ سپورٹس گالا کا انعقاد کیا گیا اور مختلف کھیلوں کی فاتحہ ٹیموں اور منتظمین کے لئے تقریب تقسیم انعامات کا انعقاد کیا گیاجس کے مہمان خصوصی ڈاکٹر افتخار امجد علی پریذیڈنٹ ڈسٹرکٹ بورڈ آف مینجمنٹ اوکاڑہ اور میجر ریٹائرڈ جاوید عامر مسعود ایگزیکٹو ممبرتحصیل مینجمنٹ کمیٹی دیپالپور تھے۔ ڈاکٹر افتخار امجد علی نے اپنے خیالات کا اظہار کرتے ہوئے کہا کہ کھیل ناصرف ذہنی وجسمانی نشوونما میں اہم کردار ادا کرتے ہیں بلکہ ٹیم ورک اور لیڈرشپ جیسی صلاحیتوں کو بھی اجاگر کرتے ہیں ۔ انہوں نے سپورٹس گالا کے کامیاب انعقاد پر پرنسپل لیاقت شہزاد اورسٹاف کی کارکردگی کو سراہا اور مبارکباد پیش کی۔انہوں نے طلباء وطالبات کے جوش خروش کو سراہا اور امید ظاہر کی کہ یہی جوش و جذبہ وہ عملی زندگی میں بروئے کار لا کر ملک کی ترقی میں اپنا کردار ادا کریں گے۔مہمان خصوصی نے
اول اور دوئم پوزیشن حاصل کرنے والی ٹیموں میں ٹرافیاں تقسیم کی اس کے ساتھ ساتھ مین آف دی میچ اور مین آف دی ٹورنامنٹ کو بھی انعامات سے نوازا۔تقریب سے قبل پرنسپل ادارہ لیاقت شہزاد خان نے معزز مہمانان گرامی کاپرتپاک استقبال کیا۔
