ملتان،یکم مارچ(اے پی پی ): کمشنر انجینئر عامر خٹک ، آر پی او کیپٹن ریٹائرڈ سہیل چوہدری نے ملتان ڈویژن میں قومی مردم شماری کا افتتاح کردیا ہے۔
عامر خٹک نے گلگشت کے علاقے میں گھر پر نمبر لگا کر قومی مردم شماری کا افتتاح کیا اور کہا کہ شمارکنندگان، جواب دہندگان کے درمیان تعاون کامیاب مردم شماری کیلئے ناگزیر ہے۔انہوں نے کہا کہ ملکی تاریخ میں پہلی ڈیجیٹل مردم شماری، ساتویں خانہ و مردم شماری کا آغاز ہوگیا ہے۔
کمشنر نے کہا کہ شمار کنندگان قومی فریضہ سرانجام دے رہے ہیں ، قومی مردم شماری یکم مارچ تا یکم اپریل تک جاری رہے گی۔ انہوں نے کہا ڈویژن میں 5559 شمار کنندگان، 873 سپروائزر مردم شماری میں ڈیوٹی سرانجام دیں گے۔
انہوں نے کہا کہ ڈویژن بھر میں مردم شماری کیلئے 10219 بلاک بنائے گئے ہیں، 140 چارجز، 1194 سرکل، 2338 موضعہ جات میں مردم شماری کی جائے گی۔انہوں نے کہا کہ جدید دور میں ٹیکنالوجی کی کلیدی کردار سے انکار ممکن نہیں جبکہ مردم شماری کو ملک کی منصوبہ بندی کیلئے اہم ذریعہ سمجھا جاتا ہے۔
کمشنر نے کہا کہ ملکی آبادی کی مستقبل کی ضروریات بارے مردم شماری کا کلیدی کردار ہے۔ انہوں نے کہا کہ ہر شہری پورٹل پر ڈیجیٹل مردم شماری میں از خود اپنا ڈیٹا اپ لوڈ کر سکے گا۔
آر پی او کیپٹن(ر) سہیل چوہدری نے کہا کہ ہر شمارکنندگان کیساتھ سیکورٹی اہلکار ڈیوٹی سرانجام دے گا اور ڈویزن میں 5 ہزار سے زائد پولیس اہلکار ڈیوٹی سرانجام دیں گے۔انہوں نے کہا کہ مردم شماری کیلئے فول پروف سیکورٹی فراہم کی جائے گی۔
