اجلاس میں ہیٹ ویو اور شدید گرمی سے جنگلات میں آتشزدگی کے خطرات کا جائزہ لیا گیا

لاہور، 12 اپریل(اے پی پی): ڈائریکٹر جنرل پی ڈی ایم اے کی ہدایت پر ڈائریکٹر کوارڈینیشن کی زیرصدارت ہیٹ ویو اور فاریسٹ فائر بارے کمیٹی روم میں اہم اجلاس منعقد ہوا جس میں آنے والے دنوں میں ہیٹ ویو اور شدید گرمی سے جنگلات میں آتشزدگی کے خطرات کا جائزہ لیا گیا۔ اجلاس میں ڈائریکٹر ساوتھ حمید اللہ ملک،  سول ڈیفنس، جنگلات، زراعت، تعلیم، لوکل گورنمنٹ انڈسٹریز ، سی ڈی اے بہاولپور کے افسران نے شرکت کی۔ ایڈیشنل ڈپٹی کمشنرز رحیم یار خان اور بھکر سمیت دیگر اضلاع کے افسران بذریعہ ویڈیو لنک اجلاس میں شریک تھے ۔ ڈائریکٹر پی ڈی ایم اے نے گفتگو کرتے ہوئے کہا کہ تمام متعلقہ ادارے ہیٹ ویو کے مضر اثرات سے بچاو اور انتظامات بارے پلان پی ڈی ایم اے کو جمع کروائیں۔  طارق محمود بخاری نے کہا کہ محکمہ تعلیم بچوں کے امتحانی شیڈول بارے فی الفور پی ڈی ایم اے کو آگاہ کرے۔  ڈائریکٹر پی ڈی ایم اے نے اس خدشہ کا اظہار کرتے ہوئے کہا کہ موسمیاتی تبدیلیوں کی وجہ سے ہیٹ ویو اور گرمی کی شدت میں اضافہ ہو سکتا ہے۔ گرمی کی شدت بڑھنے سے جنگلات میں آتشزدگی کا سامنا کرنا پڑ سکتا ہے۔ انھوں نے کہا کہ محکمہ جنگلات فاریسٹ فائر سے بچاؤ کے لیے خصوصی ٹیمیں تشکیل دے کر رپورٹ جمع کروائے۔ طارق محمود بخاری نے بتایا کہ ہیٹ ویو سے بچاو کے لیے محکمہ صحت سمیت دیگر متعلقہ اداروں کو خصوصی ہدایات بھی جاری کی جاچکی ہیں۔ انھوں نے کہا کہ ہیںٹ ویو سے بزرگ شہری اور بچے زیادہ متاثر ہو سکتے ہیں۔ بچاو کے لیے شہریوں کو احتیاطی تدابیر پر عمل پیرا ہونا ہو گا۔ ڈائریکٹر پی ڈی ایم اے نے کہا کہ ہیٹ ویو کے مضر اثرات سے بچاو اور حفاظتی تدابیر بارے عوام الناس کو موثر آگاہی فراہم کی جائے۔ پی ڈی ایم اے کسی بھی ہنگامی صورتحال سے نمٹنے کے لیے ہمہ وقت تیار ہے۔