اسلام آباد،22مئی(اے پی پی):چیئرمین پاکستان علماء کونسل و انٹرنیشنل انٹرفیتھ ہارمنی کونسل حافظ محمد طاہر محمود اشرفی نے کہا ہے کہ مقبوضہ کشمیر میں جی20 کانفرنس میں چین ، سعودی عرب ، ترکی اور مصر کے شرکت نہ کرنے پر شکریہ ادا کرتے ہیں، ہندوستان کی سازش ناکام ہوئی ، ہندوستان کی آر20 کانفرنس میں بھی کوئی شرکت نہیں کرے گا،پاکستان علماء کونسل نے ملک کی موجودہ صورتحال اورمقبوضہ کشمیر کے عوام سے اظہار یکجہتی کیلئے کل جماعتی کانفرنس بلانے کا فیصلہ کیا ہے ، 9 مئی کا یوم سیاہ دہشت گردوں اور امن پسندوں کے درمیان واضح تقسیم کرتا ہے ، ملک کی تمام سیاسی و مذہبی جماعتوں کو 9 مئی کے سانحہ میں ملوث مجرمین کے خلاف واضح موقف اپنانا چاہئے ، کسی مجرم کو چھوڑا نہ جائے اور بے گناہ کو گرفتار نہ کیاجائے۔
یہ بات انہوں نے پیر کو یہاں پریس کانفرنس سے خطاب کرتے ہوئے کہی ۔ اس موقع پر مولانا نعمان حاشر، مولانا طاہر عقیل اعوان، مولانا ابو بکر حمید صابری ، مولانا ذوالفقار ، صاحبزادہ حافظ ثاقب منیر، مولانا نائب خان ، مولانا حفیظ الرحمن ، مولانا شہباز احمد، مولانا افضل شاہ الحسینی، مولانا عاطف تنویر ، مولانا گلستان اور دیگر بھی موجود تھے ۔انہوں نے کہا کہ ہندوستان جی۔20 کی صدارت کا غلط فائدہ اٹھانا چاہتا ہے ، چین ، سعودی عرب، ترکی ، مصر اور دیگر ممالک آج اجلاس میں شریک نہیں ہوئے ان کے شکر گزار ہیں، ہندوستان نے عالمی قوانین اور اقوام متحدہ کی قراردادوں کی خلاف ورزی کی ہے ، ہندوستان کی مقبوضہ کشمیر میں R20 کانفرنس کرنے کی سازش بھی ناکام ہو گی ، کشمیر کے مسئلہ پر اسلامی تعاون تنظیم ، رابطہ عالم اسلامی کا موقف واضح ہے۔
ایک سوال کے جواب میں حافظ محمد طاہر محمود اشرفی نے کہا کہ عرب سربراہ کانفرنس کا اعلامیہ امت مسلمہ کے روشن مستقبل کی نوید ہے ، سعودی عرب کا عرب سربراہ کانفرنس میں قائدانہ کردار امن ، سلامتی اور اتحاد کیلئے عملی اقدامات کو واضح کرتا ہے ، عرب سربراہ کانفرنس کا فلسطین اور امت مسلمہ کے دیگر مسائل پر مؤقف امت کی ترجمانی ہے، کشمیر اور فلسطین امت مسلمہ کے مسائل ہیں ، سعودی عرب اسلامی تعاون تنظیم کا سربراہ بھی ہے ، امید ہے کہ کشمیر اور فلسطین کے مسئلہ پر اب عملی اقدامات اٹھائے جائیں گے ، جی۔20 کے مقبوضہ کشمیر میں اجلاس کی ہندوستان کی سازش چین ، سعودی عرب ، ترکی اور مصر کے بائیکاٹ سے ناکام ہو گئی ہے، امید ہے کہ دیگر ممالک بھی ہندوستان کے اس غیر قانونی عمل کا حصہ نہیں بنیں گے۔
ایک اور سوال کے جواب میں حافظ محمد طاہر محمود اشرفی نے کہا کہ ہندوستان سے پاکستان بہتر تعلقات چاہتا ہے لیکن تعلقات کی بحالی کا راستہ کشمیر سے ہو کر آتا ہے ، ہندوستان 5 اگست کی پوزیشن پر واپس آئے اور کشمیر پر بات چیت کرے تو بات چیت کا راستہ کھل سکتا ہے ۔ چین ، سعودی عرب ، ترکی اور مصر نے ہندوستان کی مقبوضہ کشمیر میں جی۔20 کے اجلاس کے حوالے سے سازش کو ناکام بنا دیا ہے جس پر ہم ان کے مشکور ہیں۔
