ملتان،23 مئی(اے پی پی ): پاکستان انٹرنیشنل ائیرلائنز (پی آئی اے) کی پہلی حج پرواز پی کے715 ملتان سے326 عازمین کو لے کر مدینہ منورہ کیلئے روانہ ہوگئی ہے۔
ملتان انٹرنیشنل ائیرپورٹ پر عازمین حج کو رخصت کرنے کیلئے ایک پروقار تقریب منعقد کی گئی جس میں حجاج سے پاکستان کی سلامتی اور ترقی کیلئے خصوصی دعاؤں کی درخواست کی گئی۔سابق وزیراعظم سنیٹر یوسف رضاگیلانی اور ڈائریکٹر حج ریحان کھوکھر نے عازمین حج کو پھولوں کے تحائف کے ساتھ مدینہ منورہ کے لئے روانہ کیا۔ ملتان سے پہلے دن افتتاحی پروازوں کے ذریعے تقریباً 700 عازمین حج کو سعودی عرب پہنچایا جائے گا۔
تقریب سے خطاب کرتے ہوئے سابقہ وزیر اعظم یوسف رضا گیلانی نے عازمین سے گزارش کی کہ وہ سعودی عرب میں پاکستان کے سفیر بن کر جا رہے ہیں اور وہاں پر اپنے ملک کے وقار کاخیال رکھیں۔ انہوں نے عازمین سے پاکستان کے موجودہ حالات کے لئے خصوصی دعاؤں کی اپیل کی ۔
ڈائریکٹر حج ریحان عباس کھوکھر نے کہا کہ اس سال ملتان سے گورنمنٹ و پرائیوریٹ اسکیم کے تحت تقریباً 12000 عازمین سعودی عرب روانہ ہونگے ، 18 جون تک ملتان سے گورنمنٹ حج پری آپریشن مکمل ہو جائے گا۔
