چترال، 23 مئی (اے پی پی): ملک کے دیگر حصوں کی طرح چترال میں بھی پاک فوج کے ساتھ اظہار یکجہتی کے طور پر امن ریلی نکالی گئی جس میں ہر طبقہ فکر سے تعلق رکھنے والے لوگوں نے شرکت کی۔ ریلی میں پاکستان زندہ باد اور پاک فوج زندہ باد کے نعرے بھی لگائے گئے۔
ریلی فرمان اللہ کی قیادت میں اتالیق بازار سے نکل کر بائی پاس روڈپر ہوتے ہوئے چھاؤنی پل پہنچ کر وہاں سے دوبارہ چترال بازار کی طرف روانہ ہوئی۔ریلی میں مختلف سیاسی پارٹیوں، تاجریونین،سماجی کارکن، سول سوسائٹی کے نمائندگان اور دکانداروں نے شرکت کی۔ اس موقع پر علاقے کے سماجی کارکنان نے بینر ہاتھ میں پکڑے ہوئے تھے جس پر مختلف نعرے درج تھے۔ ان بینرز اور پلے کارڈ ز پر یہ سوہنی دھرتی ہے اس کے پیچھے وردی ہے، پاک فوج زندہ باد اور پاک فوج ہم تمھارے ساتھ ہیں وغیرہ کے نعرے درج تھے۔ریلی کے شرکاء نے اپنی گاڑیوں اور موٹر سائیکل پر پاکستان کا سبز ہلالی جھنڈا لگایا ہوا تھا۔
اس موقع پر میڈیا سے باتیں کرتے ہوئے ریلی کے شرکاء نے کہا کہ ہم سب تمام تر سیاست سے بالاتر ہوکر پاک فوج کے ساتھ اظہار یکجہتی کے طور پر اس ریلی میں شریک ہوئے، پاک فوج ہے تو ہم سکون کی نیند سوتے ہیں ورنہ شام، عراق، افغانستان، فلسطین کی حالت سب کے سامنے ہیں اور کہا کہ جو لوگ ہمارے قومی اداروں کے خلاف نفرت پھیلاتے ہیں یا قومی املاک پر حملہ کرکے ان کو نقصان پہنچا تے ہیں ہم ان کی پرزور الفاظ میں مذمت کرتے ہیں اور ان کےاس منفی ایجنڈے کو یکسر مسترد کرتے ہیں۔ ریلی چھاونی پل سے واپس آکر بائی پاس روڈ پر پر امن طور پر منتشر ہوئی۔
