اوکاڑہ،08جون(اے پی پی): ڈپٹی کمشنر ڈاکٹر محمدذیشان حنیف نے کہا ہے کہ جدید طریقہ کاشت کاری زرعی معیشت میں انقلاب کی بنیاد ہے مشینی کاشت سے جہاں پیداواری لاگت کم ہوگی وہیں پر پیداوار میں اضافہ سے ملکی غذائی خود کفالت کی منزل حاصل کرے گا ضرورت اس امر کی ہے کہ ہمارے کاشت کار جدید زرعی ریسرچ سے فائدہ اٹھائیں اور کاشتکاری کو ایک منافع بخش سیکٹر بنانے کے لئے پنجاب حکومت کی کاشتکاروں کے لئے فراہم کی جانے والی سہولیات سے فائدہ اٹھائیں۔
ان خیالات کا اظہار انہوں نے آن فارم واٹر مینجمنٹ اوکاڑہ کی جانب سے سبسڈی پر کاشت کاروں کو 100 عدد لینڈ لیولر قرعہ اندازی کے ذریعے دئیے جانے کی تقریب سے خطاب کرتے ہوئے کیا ،انہوں نے کاشت کاروں سے خطاب کرتے ہوئے کہا کہ پنجاب حکومت کاشتکاروں فلاح و بہبود کے لئے جو منصوبے شروع کر رہی ہے ان پر سو فیصل عملد ر آمد کو یقینی بنانے کے لئے ضلعی انتظامیہ تمام وسائل بروئے کار لا رہی ہے بعد ازاں انہوں نے لینڈ لیولر کاشتکاروں کو دئیے جانے کی قرعہ کی اور خوش نصیب کاشتکاروں کو مبارکباد دیتے ہوئے کہا کہ وہ پنجاب حکومت کی سکیم سے فائدہ اٹھائیں اورر زرعی معیشت کی بہتری میں اپنا کردار ادا کریں اس موقع پر ڈپٹی ڈائر یکٹر آن فارم واٹر مینجمنٹ سعید اللہ علوی نے بتایا کہ ضلع اوکاڑہ میں شفاف قرعہ اندازی کے ذریعے 100 کاشتکاروں کو لینڈ لیولر فراہم کئے جا رہے ہیں جن میں سے تحصیل اوکاڑہ میں 30 ،تحصیل رینالہ خورد 15 ،تحصیل دیپالپور میں 55 لینڈ لیولر کاشتکاروں کو 2 لاکھ 50 ہزار فی لیزر لینڈ لیولر سبسڈی پر دئیے جائیں گے، اس مقصد کے لئے 434 درخواستیں موصول ہوئیں، 52 درخواستیں نا مکمل ہونے پر مسترد ہوئیں جبکہ 382 کے درمیان 100 خوش نصیب کاشتکاروں کو لیزر یونٹ شفاف قرعہ اندازی کے ذریعے دئیے گئے۔
ڈپٹی کمشنر ڈاکٹر محمد ذیشان حنیف نے کاشتکاروں سے قرعہ اندازی کروائی اس موقع پر ایڈیشنل ڈپٹی کمشنر فنانس اینڈ پلاننگ چوہدری طاہر امین،واٹر مینجمنٹ آفیسر حامدنواز شاہ اور دیگر متعلقہ افسران بھی موجود تھے۔
