لاہور،9جون ( اے پی پی ):وزیراعلیٰ پنجاب محسن نقوی نے کہا ہے کہ راولپنڈی، فیصل آباد اور گوجرانوالہ میں سیف سٹی پراجیکٹ شروع کر رہے ہیں۔ تینوں شہروں میں سیف سٹی پراجیکٹس تقریباً 100 ارب روپے میں بننے تھے لیکن ہم یہ پراجیکٹس 5 ارب روپے میں مکمل کرنے کی کوشش کریں گے۔
وہ جمعہ کو یہاں ایلیٹ پولیس ٹریننگ سکول بیدیاں روڈ پر بیسک ایلیٹ کمبیٹ (Combat) کورس 24 کی پاسنگ آؤٹ پریڈ کی تقریب سے خطاب کررہے تھے۔بیسک ایلیٹ کمبیٹ کورس 39 خواتین اور 542 مرد پولیس اہلکاروں نے کامیابی سے مکمل کیا۔
نگران وزیراعلیٰ محسن نقوی نے مارشل آرٹس، فائرنگ تکنیکس، انسداد دہشت گردی کے آپریشن اور دیگر مہارتوں کا عملی مظاہرہ دیکھا اور پولیس جوانوں کی پیشہ ورانہ مہارت کو سراہا۔ پاس آؤٹ ہونے والے جوانوں نے نگران وزیراعلیٰ محسن نقوی کو سلامی پیش کی۔نگران وزیراعلیٰ محسن نقوی نے تربیت مکمل کرنے والے بیج کی پاسنگ آؤٹ پریڈ کا معائنہ کیا اور تربیت کے دوران نمایاں کارکردگی دکھانے والے مرد و خواتین اہلکاروں میں انعامات تقسیم کئے۔
نگران وزیراعلیٰ پنجاب محسن نقوی نے پاسنگ آؤٹ پریڈ سے خطاب کرتے ہوئے کہا کہ پاس آؤٹ ہونے والے مرد و خواتین پولیس اہلکاروں کو مبارکباد دیتا ہوں اور ان کیلئے نیک خواہشات کا اظہار کرتا ہوں، مستقبل آپ جیسے جوانوں کا ہے،محنت سے فرائض سرانجام دیں اور بہادری کے ساتھ جرائم پیشہ عناصر کا قلع قمع کریں۔انہوں نے کہا کہ 4 ماہ میں پولیس کی فلاح و بہبود کیلئے متعدد اقدامات کئے ہیں، پنجاب حکومت پولیس سے متعلقہ دیگر ایشوز بھی ترجیحی بنیادوں پر حل کرے گی۔
محسن نقوی نے ایلیٹ پولیس فورس کیلئے الاؤنس 10 ہزار روپے کرنے کا اعلان کرتے ہوئے کہا کہ پنجاب کابینہ کے آئندہ اجلاس میں پولیس فورس کے الاؤنس میں اضافے کی منظوری دی جائے گی۔ انہوں نے کہا کہ سپیشل برانچ کیلئے سروس سٹرکچر بنایا جائے گا۔ایلیٹ پولیس ٹریننگ سکول میں انسٹرکٹرز اور ٹرینرز کی کمی کو دور کیا جائے گا اور اس ضمن میں الیکشن کمیشن سے اجازت لے کر مزید اقدامات کریں گے۔ایلیٹ پولیس فورس کیلئے نائٹ آپریشن کیلئے آلات اور دیگر ساز و سامان خریدیں گے۔
نگران محسن نقوی نے کہا کہ ایلیٹ پولیس فورس کی تربیت کیلئے بیسک کورس کو اپ گریڈ کرنے کی ضرورت ہے جبکہ نمایاں کارکردگی دکھانے والے جوانوں کو ایڈوانس کورس بھی کرائے جائیں گے۔ایلیٹ پولیس ٹریننگ سکول میں سوئمنگ پول کو جلد فنکشنل کر دیا جائے گا۔
انسپکٹر جنرل پولیس ڈاکٹر عثمان انور نے تقریب سے خطاب کرتے ہوئے کہا کہ پنجاب پولیس نے ہمیشہ جرأت اور بہادری کی داستانیں رقم کی ہیں۔ حال ہی میں مسلح جتھوں نے شرپسندی کی، پولیس نے بڑے تحمل اور پیشہ ورانہ انداز میں جواب دیا۔انہو ں نے کہا کہ نگران وزیراعلیٰ محسن نقوی نے پولیس کی ویلفیئر کیلئے بے مثال کام کیا ہے۔کمانڈنٹ ایلیٹ پولیس ٹریننگ سکول نوید وقاص نے سپاسنامہ پیش کیا۔
صوبائی وزراء ایس ایم تنویر، عامر میر، ایڈیشنل آئی جیز، ڈی آئی جیز، سی سی پی او لاہور، ایس ایس پیز، سیکرٹری اطلاعات اور پاس آؤٹ ہونے والے پولیس جوانوں کے عزیز و اقارب کی بڑی تعداد بھی اس موقع پر موجود تھی۔
