نگران وزیراعلیٰ پنجاب کی زیر صدارت اجلاس،سانحہ 9 مئی کے واقعات میں ملوث شرپسندوں کے خلاف قانونی کارروائیوں کا جائزہ لیا گیا

9

 

لاہور،9جون ( اے پی پی ):نگران وزیراعلیٰ پنجاب محسن نقوی کی زیر صدارت وزیراعلیٰ آفس میں اجلاس منعقد ہوا جس میں سانحہ 9 مئی کے واقعات میں ملوث شرپسندوں کے خلاف قانونی کارروائیوں کا جائزہ سمیت شرپسندوں کے خلاف پراسیکیوشن کے عمل پر پیشرفت کابھی غور کیا گیا۔

اجلاس کے شرکاء کو بتایا گیا کہ9مئی کے واقعات میں ملوث مزید 1163 شرپسندوں کا ڈیٹا بیس مل گیا ہے اور سائنٹیفک انداز سے1163شرپسندوں کی شناخت کا عمل شروع کر دیا گیا ہے۔

 نگران وزیراعلیٰ محسن نقوی نے مفرور شرپسندوں کی جلد گرفتاری یقینی بنانے کا حکم دیتے ہوئے کہا کہ تمام ضروری وسائل بروئے کار لاکرمفرور شرپسندوں کو قانون کے کٹہرے میں لایا جائے اور آخری شرپسند کی گرفتاری تک ان کا تعاقب جاری رکھا جائے۔انہوں نے کہا کہ کسی شرپسند سے کوئی رعایت نہیں ہوگی۔شرپسندوں اورانہیں اکسانے والوں کو کسی صورت معاف نہیں کیا جائے گا۔

اجلاس میں شرپسندوں کے خلاف پراسیکیوشن کو مزید موثر انداز میں آگے بڑھانے کا فیصلہ کیا گیا۔ نگران وزیراعلیٰ محسن نقوی نے پولیس اورپراسیکیوشن کو بہترین کوآرڈینیشن کے ساتھ کیسوں کی پیروی کی ہدایت کرتے ہوئے کہا کہ کسی گناہ گار کو چھوڑنا نہیں اور بے گناہ کو پکڑنا نہیں۔

انسپکٹرجنرل پولیس نے شرپسندوں کی گرفتاریوں،تفتیش اورمقدمات پر ہونے والی پیش رفت کے بارے میں بریفنگ دی۔

صوبائی وزیر اطلاعات عامر میر، انسپکٹر جنرل پولیس، ایڈیشنل چیف سیکرٹری،ایڈیشنل آئی جی سپیشل برانچ، سی سی پی او لاہور، سیکرٹری قانون، سیکرٹری پراسیکیوشن،ایڈیشنل چیف سیکرٹری داخلہ، سیکرٹری اطلاعات، ایڈیشنل آئی جی سی ٹی ڈی، آئی جی جیل خانہ جات اور متعلقہ حکام نے اجلاس میں شرکت کی۔ چیف سیکرٹری،ملتان،راولپنڈی، فیصل آباد اور سرگودھا کے کمشنرز اور آر پی اوز ویڈیو لنک کے ذریعے اجلاس میں شریک ہوئے۔