چنیوٹ ،15 جون (اے پی پی):پنجاب ایمرجنسی سروس ڈسٹرکٹ چنیوٹ نے سیلاب جیسی آفت سے نبرد آزما ہونے کیلئے دریائے چناب ٹی ڈی سی پی پوائنٹ پر پری فلڈ موک ایکسرسائزکا انعقاد کیا، ان مشقوں کا مقصد سیلاب میں پھنسے ہوئے لوگوں کو نکالنے، ان کو محفوظ مقام پر منتقل کرنے، فلڈ آپریشن میں استعمال ہونے والے آلات کو چیک کرنے اور اداروں کے درمیان روابط کو بہتر کرنا تھا۔ ان فرضی مشقوں میں پنجاب ایمرجنسی سروس،محکمہ صحت، محکمہ ایجوکیشن، محکمہ لائیو اسٹاک، محکمہ سول ڈیفنس اور محکمہ سوشل ویلفیئر نے حصہ لیا۔
ڈپٹی کمشنر چنیوٹ محمد آصف رضا نے انسیڈنٹ کمانڈر پوسٹ، ریسکیو ڈیزاسٹر کیمپ،میڈیکل کیمپ سمیت دیگر کیمپوں کا معائنہ کیا اور سیلاب کے دوران ریسکیو اینڈ ریلیف کیلئے استعمال ہونے والے آلات کا جائزہ لیا۔
اس موقع پر ان کے ہمراہ اے ڈی سی آر الطاف حسین انصاری،اسسٹنٹ کمشنر اشفاق احمد،ڈسٹرکٹ ایمرجنسی آفیسر میڈم طاہرہ خان و دیگر اداروں کے ضلعی افسران بھی موجود تھے،ریسکیو اہلکاروں کی جانب سے ڈوبتے ہوئے لوگوں کو بچانے،سیلاب میں پھنسے لوگوں کو بحفاظت باہر نکالنے، کشتی رانی،میڈیکل ڈیمو کا عملی مظاہرہ بھی کیا گیا،پنجاب ایمرجنسی سروس ڈسٹرکٹ چنیوٹ کی طرف سے لگائے جانے والے کیمپس میں رجسٹریشن پوائنٹ، میڈیکل کیمپ، انسڈنٹ کمانڈ پوسٹ اور سیلاب میں استعمال ہونے والے سازوسامان شامل تھے جبکہ محکمہ ہیلتھ، ایجوکیشن، سول ڈیفنس،سوشل ویلفیئر اور دیگر محکموں کی جانب سے بھی ریلیف کیمپس لگائے گئے تھے۔
ڈسٹرکٹ ایمرجنسی آفیسر میڈم طاہرہ خان نے ممکنہ سیلاب کے پیش نظر مکمل بریفنگ دی۔ ان کا کہنا تھا کہ سیکرٹری ڈائریکٹر جنرل پنجاب ایمرجنسی سروس ڈیپارٹمنٹ ڈاکٹر رضوان نصیر (ستارہ امتیاز) کی ہدایات پر اب تک 169 گاؤں میں ایمرجنسی ریسپانس ٹیموں کو تربیت دی گئی ہے جو کہ کسی بھی ایمرجنسی کی صورت میں فوری طور پر پنجاب ایمرجنسی سروس کے پہنچنے سے پہلے لوگوں کو مدد فراہم کر سکتے ہیں، ایمرجنسی رسپانس ٹیمز میں 1900 ریسکیو محافظوں کو تربیت دی جا چکی ہے جس میں 900 کے قریب بلڈ ڈونرز 600 کے قریب سوئمرز موجود ہیں ان فرضی مشقوں کا مقصد پنجاب ایمرجنسی سروس ڈسٹرکٹ چنیوٹ کی تیاری حالت کو جانچنا تھا۔
انھوں نے بتایا کہ پنجاب ایمرجنسی سروس نے فلڈ سیزن 2023 کیلئے تمام انتظامات مکمل کر لیے ہیں۔
اس موقع پر ڈپٹی کمشنر چنیوٹ محمد آصف رضا نے کہا کہ یہ ہماری دوسری پری فلڈ موک ایکسرسائز ہے جس کا مقصد اداروں کی تیاری کو جانچنا ہے ۔ان کا کہنا تھا کہ ضلع چنیوٹ کے تمام ادارے کسی بھی ناگہانی صورت حال سے نبرد آزما ہونے کے لیے مکمل طور پر تیار ہیں۔
ڈپٹی کمشنر چنیوٹ محمد آصف رضا نے سیلابی صورتحال سے نمٹنے کیلئے پنجاب ایمرجنسی سروس اور متعلقہ ادارے کی تیاریوں پر مکمل اطمینان کا اظہار کیا ۔ان کا کہنا تھا کہ پاکستان یا دنیا کے کسی ملک میں بھی ریسکیو 1122 کو ماڈل کے طور پر جانا جاتا ہے، انہوں نے کامیاب فرضی مشقیں کرنے پر تمام ریسکیو آفیسرز، ریسکیو اہلکاروں اور ریسکیو محافظ کی پیشہ ورانہ صلاحیتوں کو سراہا۔
