لاہور، 8 جولائی(اے پی پی): سپیشل پروٹیکشن یونٹ (ایس پی یو) کے افسر اور اہلکار چینی زبان سیکھیں گے-پنجاب یونیورسٹی کے الرازی ہال میں آج سپیشل پروٹیکشن یونٹ کے افسروں اور عملے کیلئے چینی زبان کے کورس کے آغاز کی تقریب منعقد ہوئی- نگران وزیراعلیٰ پنجاب محسن نقوی اور چین کے قونصل جنرل زاؤ شیرین مہمان خصوصی تھے-ایس پی یو کے افسروں اور اہلکاروں کیلئے چینی زبان کا کورس 16 ستمبر تک جاری رہے گا- نگران وزیراعلیٰ محسن نقوی نے سپیشل پروٹیکشن یونٹ کے افسروں اور عملے کیلئے چینی زبان سکھانے کا پروگرام شروع کرنے پر چین کے قونصل جنرل کا شکریہ ادا کیااور نگران وزیر اعلی محسن نقوی نے تقریب سے خطاب کرتے ہوئے کہا کہ چینی زبان اب ایک بین الاقوامی لینگوئج بن چکی ہے۔چینی لینگوئج سیکھنے سے سپیشل پروٹیکشن یونٹ کے عملے کو چینی بھائیوں سے بات چیت میں آسانی ہوگی۔ چینی قونصل جنرل زاؤ شیرین نے ذاتی دلچسپی لے کر ہماری درخواست پر ایس پی یو کیلئے چینی زبان کا کورس شروع کرایا۔ایس پی یو غیر ملکی شہریوں خصوصاً چینی بھائیوں کی حفاظت کیلئے گراں قدر خدمات سرانجام دے رہا ہے۔چین کے تعاون سے صوبے کے عوام کی فلاح کیلئے مزید اقدامات کریں گے۔چینی قونصل جنرل زاؤ شیرین نے تقریب سے خطاب کرتے ہوئے کہا کہ نگران وزیراعلیٰ محسن نقوی کی خواہش پر چینی قونصلیٹ نے پنجاب حکومت کے تعاون سے یہ پروگرام شروع کیا ہے۔وزیراعلیٰ محسن نقوی کی عوامی خدمات سے بہت متاثر ہوں۔دو طرفہ تعلقات میں اضافے کیلئے بھی وزیراعلیٰ محسن نقوی مثالی اقدامات کر رہے ہیں۔ایس پی یو کے افسروں اور اہلکاروں کیلئے چینی لینگوئج کا کورس خصوصی اہمیت رکھتا ہے۔ بھرپور تعاون پر وزیراعلیٰ محسن نقوی کے شکر گزار ہیں۔انسپکٹر جنرل پولیس ڈاکٹر عثمان انور، وائس چانسلر پنجاب یونیورسٹی ڈاکٹر خالد محمود، ایڈیشنل چیف سیکرٹری داخلہ، ڈی آئی جی ایس پی یو طیب حفیظ چیمہ، سی سی پی او لاہور، ڈپٹی قونصل جنرل چینی قونصلیٹ، چینی زبان سکھانے والے ٹیچرز اور سپیشل پروٹیکشن یونٹ کے افسر و اہلکار بھی اس موقع پر موجود تھے-
