سکھر،13جولائی(اے پی پی): ضلع بھر میں محرم الحرام کے انتظامات کے حوالے سے اعلیٰ سطحی اجلاس جمعرات کو یہاں ڈپٹی کمشنر آفس کے کانفرنس روم میں منعقد ہوا ۔
چیئرمین ضلع کونسل سکھر، ڈپٹی میئر سکھر اور ڈپٹی کمشنر سکھر ڈاکٹر شہزاد طاہر تھہیم نے ایک اعلیٰ سطحی اجلاس سے خطاب کرتے ہوئے کہا کہ محرم ایک مقدس مہینہ ہے جس میں شہداءکو محبت، بھائی چارے اور امن کے ساتھ بلا تفریق خراج عقیدت پیش کیا جاتا ہے۔ضلعی انتظامیہ سکھر کی جانب سے محرم الحرام کے دوران سیکیورٹی کے فول پروف انتظامات کیے جائیں گے، پولیس کے ساتھ ساتھ رینجرز کو بھی سکیورٹی فراہم کرنے پر مامور کیا جائے گا۔
انہوں نے جلوسوں کے راستوں پر صفائی ستھرائی اور روشنی کے انتظامات کو مزید بہتر کرنے کی ہدایت کرتے ہوئے کہا کہ جلوسوں کے راستوں پر صفائی ستھرائی اور روشنی کے انتظامات کو بہتر بناکر نگرانی کی جائے،اس سلسلے میں مجالس و جلوس کے منتظمین اور سکاوٹس کا تعاون ضروری ہے۔
انہوں نے کہا کہ اسسٹنٹ کمشنرز میونسپل افسران اور دیگر متعلقہ افسران کے ساتھ مختلف علاقوں کا دورہ کریں گے اور سہولیات کا جائزہ لیں گے۔
ڈی سی سکھر ڈاکٹر شہزاد طاہر تھہیم نے محکمہ صحت کے حکام کو ہدایت کی کہ عشرہ محرم کے دوران تمام ہسپتالوں میں عملہ، ایمبولینسیں اور ادویات کی دستیابی کو یقینی بنایا جائے ، تمام ضروری کام محرم سے قبل مکمل کر لیے جائیں گے۔
ڈی سی سکھر کا کہنا تھا کہ پولیس محرم کے حوالے سے پلان بنائے، جس کے تحت اسنیپ چیکنگ کو بڑھایا جائے گا جبکہ ریپڈ رسپانس ٹیمیں بھی تشکیل دے دی گئی ہیں۔
علاوہ ازیں علمائے کرام نے بھی اپنے اپنے علاقوں کے حالات و واقعات بیان کئے۔
اجلاس میں ڈپٹی میئر سکھر ارشد مغل، چیئرمین ضلع کونسل سکھر سید کمیل حیدر شاہ کے علاوہ رینجرز، پولیس و متعلقہ حکام ریونیو، صحت، لوکل باڈیز، سول ڈیفنس، 1122 کے سٹیشن منیجر اور دیگر متعلقہ محکموں کے افسران اور علمائے کرام نے بڑی تعداد میں شرکت کی ۔
