کوئٹہ،18جولائی (اے پی پی):محرم الحرام 1445 ہجری کا چاند نظر نہیں آیا ،یکم محرم الحرام 20جولائی بروز جمعرات اور یوم عاشور 29 جولائی بروز ہفتہ کو ہوگا ۔
منگل کو اس بات کا اعلان مرکزی رویت ہلال کمیٹی کے چیئرمین مولانا محمد عبدالخبیر آزاد نے کوئٹہ میں مرکزی رویت ہلال کمیٹی کے اجلاس کے بعد پریس کانفرنس میں کیا ۔ماہ محرم الحرام کا چانددیکھنے کیلئے چیئرمین مرکزی رویت ہلال کمیٹی کا اجلاس مولانا سید محمد عبد الخبیر آزاد کی زیر صدارت بمقام دفتر ڈپٹی کمشنر کچہری روڈ کوئٹہ میں منعقد ہوا۔
اجلاس میں ڈائریکٹر جنرل مذہبی امورسید مشاہد حسین خالد نے جبکہ فنی معاونت کے لیے محکمہ موسمیات سے چیف میٹ سردار سرفراز، محکمہ سپارکو سے غلام مرتضیٰ اوروزارت سائنس اینڈ ٹیکنالوجی حکومت پاکستان سے جوائنٹ سیکرٹری زین العابدین نے اپنی خدمات سر انجام دیں،اجلاس میں وزارت مذہبی امور پاکستان سے حافظ عبدالقدوس اور سیکرٹری مذہبی اموراوقاف بلوچستان ندیم الرحمن،ڈپٹی کمشنر کوئٹہ شائق بلوچ نے جبکہ فنی معاونت کے لیے محکمہ موسمیات سے چیف میٹ ڈاکٹر سردار سرفراز، محکمہ سپارکو سے غلام مرتضیٰ اور وزار تِ سائنس اینڈ ٹیکنالوجی سے زین العا بدین نے اپنی خدمات سرانجام دیں۔
اجلاس میں مرکزی رؤیت ہلال کمیٹی پاکستان کے جو اراکین شریک ہوئے جن میں ڈاکٹر راغب حسین نعیمی،صاحبزادہ سید حبیب اللہ چشتی،قاری مہراللہ،مولاناعبدالمالک بروہی،مفتی علی اصغر عطاری،مفتی فیصل احمد،مفتی یوسف کشمیری،پیرسید شاہد علی جیلانی اور زونل ممبران میں مولانا انوار الحق حقانی،ڈاکٹر عطاء الرحمن،قاری حفیظ اللہ، مولانا نقیب اللہ آغا، مولانا محمد جان قاسمی، قاری عبدالرشید ہزاروی، علامہ قربان علی توسلی، مولانا عتیق الرحمن شاہ و دیگر علماء کرام میں علامہ ولایت حسین جعفری،علامہ ڈاکٹر موسیٰ حسینی،مفتی محمدروزی خان،علامہ سید نصر اللہ حسینی،مولانا مختیار احمد حبیبی،مولانا ابرار احمد،مولانا حیدر علی،میاں اجمل عباس،حاجی غلام حسین چانڈیوشامل تھے اس کے علاوہ پاکستان بھر میں زونل رؤیت ہلال کمیٹیوں کے اجلاس ان کے متعلقہ ہیڈ کوارٹرزاسلام آباد،لاہور،پشاور،کراچی میں منعقد ہوئے جس میں زونل رؤیت ہلال کمیٹیوں کے ممبران اور فنی ماہرین نے شرکت کی۔
مولانا سید محمد عبد الخبیر آزاد چیئر مین مرکزی رویت ہلال کمیٹی پاکستان نے اعلان کرتے ہوئے کہا کہ آج پاکستان کے اکثر و بیشتر مقامات پر مطلع صاف رہا اور کچھ مقامات پر مطلع ابر آلودبھی رہا، پاکستان کے کسی بھی مقام سے ماہ محرم الحرام کا چاند نظر آنے کی کوئی شہادت موصول نہیں ہوئی،پورے ملک میں عدم رویت رہی اور چاند نظر نہیں آیا لہذا اتفاق رائے سے فیصلہ کیا گیا کہ یکم محرم الحرام 20 جولائی2023ء بروزجمعرات جبکہ یوم عاشور10محرم الحرام29جولائی2023ء بروزہفتہ کو ہو گا۔
مولاناسید محمد عبدالخبیر آزاد نے کہاکہ محرم الحرام میں قیام امن،اتحاد بین المسلمین و بین المسالک ہم آہنگی اور پیغام پاکستان کے فروغ کو زیادہ سے زیادہ عام کیا جائے، پیغام پاکستان،پاکستان کا وہ ضابطہ اخلاق ہے جس کو عام کرنا ہم سب کی ذمہ داری ہے۔
اجلاس کے آخر میں عالم اسلام کے اتحاد،حرمین شریفین کے تحفظ، ملک پاکستان کی سلامتی و استحکام، ترقی وخوشحالی،اتحادووحدت،مقبوضہ کشمیر و فلسطین کی آزادی اور ژوب میں افواج پاکستان کے جو جوان شہید ہوئے ان کے درجات کی بلند ی ومغفرت کیلئے خصوصی دعا کی گئی۔
